والد الطالبة جنى المتهم بخطفها: بنتي مريضة نفسيا ورمت نفسها من الشباك| خاص
كشفت التحقيقات تفاصيل مصرع الطالبة جنى ضحية الخطف على يد والدها وأشقائها بمنطقة المقطم، بعد اتهامهم بخطفها والتسبب في وفاتها.
قضية الطالبة جنى ضحية
وحصل القاهرة 24 على نص تحقيقات القضية رقم 1008 إداري المرج لسنة 2024، وجاءت أقوال والد الطالبة جنى المتهم بخطفها كالآتي: أنا شغال سائق تاكسي وعندي 58 عاما، وبسؤاله عن اتهامه بخطف المجني عليها؛ أجاب: لاء طبعا مفيش أب بيخطف بنته.
وأضاف والد الطالبة جنى: اللي حصل أن أول يوم عيد الأضحى الماضي حوالي الساعة 7:30 مساء، أخدت ولادي الاتنين يوسف وأحمد وطلعنا على منطقة المقطم عند بيت خالة بنتي، وهناك شوفت بنتي جنى طالعة من صلاة العيد، وقولت لأولادي انزلوا هاتوها، وأخدتها وخليتها تكلم أمها تقولها أنا مع بابا واخواتي متقلقيش عليا وبعد كده طلعنا على البيت عندي.
وأكمل والد الطالبة جنى: روحنا البيت قعدنا وكلنا وكانت البداية كويسة، وتاني يوم وأنا بتكلم معاها عرفت أن هي كانت بتتعالج عند دكتور نفسي واتحجزت 25 يوما، وكلمت الدكتور وقالي أنتم السبب في اللي بيحصل للبنت.
وواصل: الدكتور قالي الضغط النفسي اللي البنت فيه ممكن تموت نفسها، وأنا بعد كده كلمت أمها وطلبت منها تخلي اخواتها تكتب إيصالات أمانة كل إيصال بـ 200 ألف جنيه عشان أرجع البنت، ويخلوني بعد كده أعرف أشوفها وخلاص.
وأكمل والد الطالبة جنى: يوم الوفاة الصبح هي قالت لمراتي هو بابا فين قالتلها نزل، وبعد كده دخلت باست اخواتها ودخلت الغرفة بتاعتها وقفلت الباب وراحت ناطة من الشباك، وبعد كده عرفنا من الناس اللي تحت أن هي انتحرت واخواتها نزلوا وكلموني وجيت ساعتها وشوفتها وهي على الأرض، وبعد كده روحت مستشفى عشان أجيب ورق إن هي مريضة نفسيا وكلمت طليقتي وقولتها بنتك ماتت وده كل اللي حصل.
