نيكول سابا: البنات في الزمن ده ضد الرجالة.. والست لازم تبقى لغز محير للرجل
ردت الفنانة نيكول سابا عن سبب تحاملها على الرجال في معظم أغانيها، مؤكدة أنه ليس بالضروري أن تكون أغانيها تعكس ما تهتم به.
وقالت نيكول سابا في لقائها مع القاهرة 24: في الزمن ده البنات كلهم ضد الرجالة، والبنات أصبحت حادة ومتحاملين على الرجالة، وزمان لما كنت بعكس ده في أغانيا كان بيكون حالة، دلوقتي الموضوع أصبح عادي لأن كل البنات كده، ومش شرط اللي بقوله في أغانيا بيعكس طبيعيتي وأنا ممكن أكون العكس.
وأضافت نيكول سابا: مش لازم أكون دايمًا بعكس كل اللي جوايا، أنا دايما بقول حلو الست تكون لغز الراجل أو الإنسان عامة يكسر دماغه عشان يكتشفها، ومش حلو تكون كتاب مفتوح واضح وظاهر لازم تخلي حاجة لبعدين، بحس إن علامة الاستفهام حلوة خاصة الفنان مش لازم نعرف كل حاجة عنه وعن طباعه.
على جانب آخر، كشفت الفنانة نيكول سابا كواليس أغنيتها الكت كاتي، والتي طرحتها مؤخرًا، مشيرة إلى أنها تحب تقديم أغاني فريش ومميزة خاصة في موسم الصيف.
وقالت نيكول: الأغنية فيها فرفشة ولذاذة وريأكشنات طول الوقت، وأنا طبيعية بريأكشناتي ومش متصنعة.
وعن الانتقادات التي تعرضت لها قالت: إيه اللي أوفر؟ إحنا بنصور على البحر، يعني هنلبس كوم وصوف؟! إحنا مش بنشوف الناس بتلبس ايه على البحر؟، وأنا دايما أعمالي بتعمل جدل، والأغنية فيها فرفشة ولذاذة وريأكشنات على عكس ما كله بيطلع زي اللوح من غير روح.
