حمزة نمرة يتحدث عن علاقته بزوجته: مستشاري وجمهوري الأول.. وباخد رأيها في جميع أعمالي
تحدث المطرب حمزة نمرة عن علاقته الأسرية بزوجته، مشيرًا إلى أنه يعتبرها جمهوره الأول ويأخذ رأيها في جميع أعماله وأغانيه، بجانب حديثه عن المنافسة في عالم الغناء والطرب وكيف يرى نفسه فيها.
حمزة نمرة يتحدث عن علاقته بزوجته
وقال حمزة نمرة - خلال لقائه مع الإعلامي عمرو الليثي على هامش مهرجان العلمين -: زوجتي هي المستشار الأول، وباخد رأيها جدًا في الأغاني، وبعتبرها جمهوري الأول، وغنيت لزوجتي أغنية غروب وأغنية الوقعة الأخيرة، بس مابنقولش على النت لأن الموضوع محرج لينا شوية.
وأضاف حمزة نمرة: اتعلمت إن رأي الناس اللي حواليا هو الأصح، من رأيي أنا في أغاني، والدواير القريبة مني رأيهم الأصوب وشفت ده ولمسته في أكتر من أغنية زي داري يا قلبي ورياح الحياة وفاضي شوية.
وتابع حمزة نمرة: أنا بطبعي انطوائي وماليش شلل وقلت ده في أغنية رايق وكنت قاصد والأغنية معبرة عني فعلا لأني ماليش في أي شلة ولا فاضي لناسي مملة ولا حد كاسر عيني ولا معادي حد ولا حد معاديني ولا عاوز أشوف مين ورايا ولا أنا سابق مين وعاوز امشي في طريقي وأعمل الفن اللي بقدمه بروقان والنجاح والتوفيق وعدمه من ربنا ولازم أفكر نفسي بالكلام ده طول الوقت لأن ده أصل حبي للفن مش المنافسة، والشهرة النجاح رزق من ربنا ده وتوفيق من ربنا.
وأكمل حمزة نمرة: اللي أقدر أقدمه إني أقدم أحسن ما عندي واجتهد في الكلمة واللحن والتوزيع وأتمرن كويس وأكون بأفضل صورة ممكنة وماليش في الصراعات ومحبش أكون فيها، ولما نزلت الألبوم في الصيف دخلني غصب عني في الصراعات لأن ده موسم وكل الناس بتنزل في الوقت ده ومكانش قصدي ولو حد شايل مني أرجو إن قلبه من ناحيتي يكون صافي لأن أنا عمري ما أعمل صراعات ولا أحبها.
