صديق لاعب الزمالك يفجر مفاجأة: أول لما الحادثة حصلت افتكرت أحمد فتوح هو اللي مات| انفراد
يستكمل القاهرة 24 نشر التحقيقات في قضية أحمد فتوح، لاعب نادي الزمالك، والمتهم بالتسبب في وفاة المجني عليه أحمد السيد بالخطأ، والقيادة تحت تأثير المخدر، والتي حملت رقم 1939 لسنة 2024 جنايات قسم العلمين، المقيدة برقم 1377 لسنة 2024 جنايات كلي مطروح.
التحقيقات في قضية اللاعب أحمد فتوح
وقال أحمد حسن فؤاد، صديق اللاعب أحمد أبو الفتوح، وشاهد على حادث الدهس في الساحل الشمالي: أنا كنت في قرية هاي سيندا باي بقالي 3 أيام أو أربعة، وامبارح وكابتن فتوح وصبحي كانوا معايا اتفقنا إننا نروح نتعشى بالليل في مطعم في العلمين جنب فندق ريكسوس، وبعد ما اتعشينا ركبنا العربية بتاعة كابتن فتوح، وكنت أنا قاعد ورا في النص، والكابتن محمد صبحى قاعد قدام جنب الكابتن أحمد فتوح، وهو اللي كان سايق وكنا راجعين على قرية هاي سيندا بای ومرة واحدة لقينا واحد بيعدي الطريق، فقلت لكابتن أحمد أبو الفتوح حاسب بصوت عالي، وفجأة خبطة جامدة حصلت، وكابتن فتوح داس فرامل والعربية فضلت ماشية بتحدف شمال، وكابتن صبحي نط من العربية، ولقيت فيه جزء من الضحية دخل العربية، وأنا قعدت أصوت لأني كنت فاكر كابتن فتوح هو اللي مات، لغاية لما فتوح هو اللي هداني وبعد كده عرفت إن احنا خبطنا واحد، وإنه مات وجزء منه دخل جوه العربية وبعد كده رحنا القسم.
قضية اللاعب أحمد فتوح
وأضاف أحمد حسن فؤاد، صديق اللاعب أحمد فتوح: احنا طلعنا من قرية هاسيندا باي ومشينا على الطريق الساحلي اتجاه مطروح، ولقينا أول كوبري ورجعنا تاني اتجاه الإسكندرية، وبعد كده لفینا تاني ورحنا مطعم اللي جنب ريكسوس واتعشينا سلمون وسوشي، وبعد كده اتحركنا من المطعم كنا راجعين هاي سیندا بای تانی.
