كنت بحاول أفوقه.. اعترافات إمام عاشور في واقعة التحرش بزوجته والتعدي على فرد أمن مول| انفراد
يواصل القاهرة 24 نشر التحقيقات في قضية إمام عاشور، لاعب النادي الأهلي، في اتهامه بالتعدي على فرد أمن بمول أركان بالشيخ زايد، التي دارت أحداثها يوم 19 يونيو الماضي، والتي كشفت تفاصيل تعرض زوجته للمضايقة والمعاكسة على يد مجموعة من الأشخاص داخل المول.
اعترافات إمام عاشور في واقعة تعديه على فرد أمن مول أركان
وينفرد القاهرة 24 بنشر أقوال إمام عاشور، لاعب النادي الأهلي بالتحقيقات في واقعة تعديه على فرد أمن مول أركان بالشيخ زايد، بعدما منعه من الدخول للمول للتعدي على شباب ضايقوا زوجته داخل المول حينما كانت في طريقها للسينما.
وقال إمام عاشور لاعب النادي الأهلي، في اعترافاته أمام جهات التحقيق: اللي حصل إني كنت في الرحاب في التجمع الخامس مع صاحبي محمود، وجالي تليفون من مراتي بتقولي إن فيه شباب عاکسوها وعايزاني أكلم معاذ أهديه علشان ميعملش مشكلة، وساعتها أنا كلمت عمر أخو مراتي الكبير، وقولتله قول لمعاذ يهدى ميعملش حاجة، ولما تطلعوا من السينما في أركان بلغوا مشرفين الأمن باللي حصل ويتحفظوا عليهم لحد ما آجي ونعمل محضر.
وأضاف إمام عاشور: لما وصلت لقيت مراتي قاعدة في العربية، وأخدت معاذ أخوها الصغير ودخلت معاه أركان ومشرفين الأمن حاولوا يوقفوني ويقولولي استنى، فأنا دخلت وجم ورايا علشان معاذ قالي إنهم متحفظين عليهم في الباركنيج اللي تحت، ولما نزلت تحت ملقيتش حد وكان فيه زحمة لإن الناس اتلمت لما شافوني، وأنا كنت بقول هما فين هما فين وبزعق لإن مراتي اتعاكست في المول.
إمام عاشور لـ أمن المول: بتصوروني ليه أنا مراتي اتعاكست
وأكمل إمام عاشور في اعترافاته أمام جهات التحقيق: ساعتها مشرفين الأمن قالوا لي أنت بتزعق ليه؟، قولت لهم أنتم المفروض متحفظين على شباب عاكسوا مراتي هما فين، طبعا محدش رد عليا وكذا واحد من مشرفين الأمن طلعوا تليفوناتهم وأنا بتكلم وصوروني، وقولت لهم أنتم بتصوروني ليه، وحصل ازدحام في اللحظة دي وأنا مشتبكتش مع حد فيهم.
إمام عاشور بالتحقيقات: لقيت فرد الأمن واقع.. وحاولت أفوقه
وأردف لاعب النادي الأهلي بالتحقيقات: وأنا بدور وشي لقيت عبد الله، مشرف الأمن المجني عليه، واقع على الأرض، ومشوفتش عبد الله غير وهو واقع علي الأرض وأول ما شفته واقع على الأرض، أنا جريت عليه وقلعته الجزمة وبحاول أفوقه وفاق بعدها على طول، وقولت للناس بعد إذنكم يا جماعة وسعوا علشان الراجل اللي وقع ياخد نفسه، ولما فاق قعد يقولي إنه عنده أسرة وأولاد وعايزك تساعدني والموضوع انتهى، وأخدت بعضي ومشيت والراجل اللي وقع اللي اسمه عبد الله بقي كويس وأخدت مراتي وأهلي وكانوا مستنيين بره مول أركان، وروحنا واتفاجأت لما روحت إن فيه خرابيش في إيدي من الزحمة والزق، ومراتي قالت لي أنت ساكت ليه، متعملش قضية قولت لها أنا مش عايز أضر حد.
