أقوال فرد الأمن في واقعة تعدي إمام عاشور عليه: شدني من القميص ووقعني على الأرض| خاص
يواصل القاهرة 24، نشر التحقيقات في قضية إمام عاشور، لاعب النادي الأهلي، في اتهامه بالتعدي على فرد أمن بمول بالشيخ زايد، التي دارت أحداثها يوم 19 يونيو الماضي، والتي كشفت تفاصيل تعرض زوجته للمضايقة والمعاكسة على يد مجموعة من الأشخاص داخل المول.
أقوال فرد الأمن ضحية إمام عاشور في واقعة تعديه عليه بالمول
وقال فرد الأمن خلال التحقيقات: أنا اسمي عبدالله مصطفي، وشغال مشرف أمن بمول بالشيخ زايد منذ سنة تقريبا، وعدد ساعات العمل بتاعتي هي 8 ساعات كل يوم، وأنا ببدأ الشغل بتاعي من الساعة 12 منتصف الليل وحتى الثامنة صباحًا.
وأضاف فرد الأمن: اللي حصل إني كنت في شغلي في الوقت اللي حصلت فيه الواقعة بتاريخ 19/6/2024 يوم الأربعاء كنت أنا مشرف أمن مول، وكان معايا في الوقت أفراد الأمن زمايلي، وبحكم إني مشرف الأمن في الوقت دا كنت بتابع الحالة الأمنية للبوابات، فوجئت حوالي الساعة السابعة إلا ربع صباحًا في عربية جت وقفت قدام بوابة المول الرئيسية ونزل منها إمام عاشور وكان في الوقت دا معاه اتنين تقريبا.
وتابع فرد الأمن ضحية إمام عاشور: أنا معرفش مين الاثنين الثانين دول وفي الوقت دا كان في عربيتن ثلاثة واقفين قدام المول وكان فيهم شباب ومعرفش مين الشباب دول وأول لما إمام عاشور دخل المول الناس دي دخلت وراه على طول، وكلهم كانوا حوالي من 10 إلى 15 شخصا، وبعد كدا اديت إشارة للأفراد بتاعت الأمن لعدم التعرض لأحد وأنا بعد كدا وبصحبتي أفراد الأمن دخلت ورا وتتبعت الموقف وساعتها إمام عاشور دخل من البوابة اللي أنا كنت عليها واستخدم السلم الكهربائي ونزل الباركينج ومعرفش هو نزل الباركينج ليه ساعتها.
وتابع فرد الأمن: وقتها أنا قولتله يا كوتش مينفعش اللي بتعملوا دا طب أفهم في إيه، رد عليا بعصبية وقالي أنتو عالم... وقال لفظ مش كويس، وأنا مراتي اتعاكست وأنا في الوقت دا قولتلو بلاش ألفاظ ومينفعش، وبعد كدا اتعصب وحاول يشدني من القميص وحاولت أجري منه وساعتها هو جري ورايا وزقني ووقعني على الأرض وبدأ الضرب كان في رجلي وضهري وراسي من الشباب اللي كانت معاه في الوقت دا وأنا في الوقت دا اغم عليا للحظات.
وأردف: إمام عاشور لما لقاني أغم عليا وقف الناس اللي معاه ومخدتش بالي مين اللي بيقوقني واتفاجئت إن في ماية بتتدلق عليا عشان أفوق، وبعد كدا فوقت وأفراد الأمن جابولي كرسي وقعدوني عليه، ولما إمام عاشور لاقني فوقت شوية أخذ الناس اللي معاه ومشيوا، وبعد كدا نزلت على مكتب الأمن لغاية لما فوقت شوية واتوجهت للصيدلية بصحبة فرد أمن عشان أجيت علاج وبعد كدا فضلت قاعد في مكتب الأمن لحين انتهاء فترة عملي وتوجهت مع السيارة الخاصة بالعاملين بالمول إلى محل سكني.
وتابع: بعد كدا قمت بالتواصل مع إدارة الأمن وأفادوني بعمل المحضر اللازم وتوجهت على قسم الشرطة وعملت محضر باللي حصل وطلعت على مستشفى الشيخ زايد المركزي عشان أكشف على نفسي وأثبت إن فيا إصابات وجيت على النيابة، وهو دا اللي حصل.
