محمد سامي يكشف كيف آمن تامر حسني بموهبته ومنحه الفرصة.. والأخير: قدمت مكسبا حقيقيا للصناعة
وجه المخرج محمد سامي الشكر والامتنان للفنان تامر حسني، لمنحه فرصة كبيرة ودعمه في بداية مشواره من خلال مسلسل آدم، مؤكدا أنه كان سببا في وصوله إلى نجاحه الحالي.
وكتب محمد سامي في منشور له: "ولا تنسوا الفضل بينكم"، وأنا قاعد امبارح في التصوير افتكرت الرحلة والشقى والتعب من أول عمل لحد العمل اللي بصوره دلوقتي وافتكرت صعوبة الحصول على فرصة عشان الواحد يثبت نفسه ويحقق أحلامه، فطبعا افتكرت أخويا وصاحبي الجدع الطيب الخلوق اللي دعمني من أول لحظة، وكان سبب في اللي أنا فيه دلوقتي.
وأشار إلى أن تامر قدم له كل الدعم والحب والإمكانيات التي ساعدته في أن يثبت نفسه، في وقت كان من الصعب أن يأخذ الشباب فرصة في الدراما بحجم مسلسل آدم.
وواصل محمد سامي: فاكر إن الكل كان رافض إني آخد الفرصة دي ومستكبرينها عليا إلا هو وقف في ظهري كأنه بيحارب لأخوه، وبصلي مرة والظروف كلها ضدي وكنت حاسس وأنا بحضر أنهم هيجيبوا حد غيري وقال لي ده مسلسلك وهتعمله وهتنجح وهتنجحنا معاك، حتى طريقته المتواضعة وهو بيقول لي مسلسلك كأني عامل 9 مسلسلات قبله، تحسس الواحد بنفسه وأهميته، أشهد أمام الله إنك طول عمرك متواضع ومؤدب وتطلب الحاجة باحترام، ومع الكرو-طاقم العمل- محترم وعشان كدة كلنا روحنا فيك، بحبك يا صاحبي وتستاهل كل حاجة حلوة يا أجمل قلب، ويا رب يرزق كل الناس باللي يساعدهم علي تحقيق أحلامهم زي ما رزقني بتامر حسني.
تامر حسني يرد على محمد سامي
من ناحيته، رد الفنان تامر حسني على منشور محمد سامي، موجهًا له الشكر ومؤكدًا أنه آمن بموهبته من البداية ورأى فيه موهبة كبيرة، مؤكدًا أن نجاحاته الأخيرة دليلًا على موهبته الحقيقية والتي جعلته مكسبا للصناعة.
وكتب تامر حسني تعليقًا على منشور محمد سامي: يا سامي يا حبيبي يا ابن الناس الطيبين شكرًا من كل قلبي على كل حرف خارج من قلبك كتبته في حقي، خلتني أدمع يا سمسم، أولًا أنا صدقت موهبتك من وأنت صغير سنًا لإنك فعلًا موهوب موهبة مش عادية وتاريخ نجاحاتك يشهد بكده، كنت عارف وأنا بقدمك إني بقدم مكسب حقيقي للصناعة ومن يوم ما سجلت رقمك على تليفوني وهو مكتوب سامي ابني، عشان كان إصراري على تقديمك كان بقلب أب مش صديق من سنك، أب مصدق في ابنه وعارف إن الناس مش هيدوله فرصه يطلع عشان سنه صغير.
وأضاف تامر حسني: الحمد لله على رحلتك ورحلتي أثبتنا للدنيا إنها مش بالسن لأ!.. بالمجهود والتعب والشطاره والمذاكرة وأنت كل الصفات دي كانت عندك، وأنا لوحدي اللي عارف، عشان كده صممت إن الدنيا كلها تعرف معايا حجم موهبتك الحقيقي، حتى أعمالي اللي من إخراجك ليها مكانة خاصة في قلوب الناس.. مسلسل آدم.. فيلم أهواك.. فيلم تصبح على خير، ولسه إن شاء الله نجاحات جاية مستنيانا مع بعض، ربنا يوفقك يا حبيبي في كل شغلك اللي جاي وتكسر الدنيا وفي القمة زي عادتك، يا محمد شكرًا تاني على المنشور الصادق ده، شكرًا يا أصيل يا محترم، ربنا يخلينا دايمًا لبعض ضهر وسند.
