كان نفسي أشيلك زي ما كنت شايلنا في عينك.. إياد العسقلاني يوجه رسالة مؤثرة لإيهاب جلال
عبر إياد العسقلاني، لاعب فريق روستوف الروسي والإسماعيلي السابق، عن حزنه الشديد من عدم تواجده اليوم في تشييع جثمان إيهاب جلال المدير الفني للإسماعيلي.
وكتب العسقلاني على صفحته الشخصية عبر موقع التواص الاجتماعي فيس بوك: كان نفسي أكون جنبك النهاردة، وأشيلك على كتفي زي ما كنت شايلنا في عينك وبتحمينا من أي حد.. كان نفسي أردك جزء من الجميل اللي أنت عمتله ليا، كان نفسي مسيبكش لوحدك.. كنت مستني أرجع إجازة عشان أحكيلك كل حاجة زي ما أنت عودتني.
وتابع: كان نفسي مكالمتك معايا أو رسايلك متخلصش.. كنت مستني اليوم اللي تخرج فيه بالسلامة، وتقف على رجلك تاني.. كان نفسي أفضل أتعلم منك كل حاجة.. كان نفسي أودعك وأحضنك عشان أنا مش هحب قدك تاني.
وأضاف: كان نفسي أكون معاك في أول ليلة ليك في قبرك، وكان نفسي تفضل تطبطب عليا لما بكون زعلان.. ومتكونش لوحدك سبتني ومشيت وسايبلي كلامك وصوتك في وداني بيفارقنيش من أول ما سمعت الخبر.. أنا اطمنت عليك لما شوفتك.. وأنت رايح تقابل وجه كريم وأعرف أنك في مكان أحسن من هنا بكتير يا أغلى الناس.. ابنك مش هينساك.. وكنت عارف لما كنت بتقولي أنت ابني اللي مخلفتهوش كانت من كل قلبك كل كلمه قولتهالي كانت صدق.. والله هشرفك وهخليك فرحان بيا زي ما أنت كنت بتتمني وهتفضل في قلب ابنك عمري ما هنساك يا حبيبي.. أشوفك على خير يا حبيبي وارتاح هتوحشني يا أبويا.
