دعمه تامر حسني.. والدة الشاب داود محارب السرطان: قدمه اتبترت عشان نسيطر على المرض
في عامه السابع عشر، عانى داود محمد عادل، من آلام في ساقه، ذهب إلى الطبيب ليكتشف أنه مصاب بسرطان في العظام، ليبدأ رحلته العلاجية ويحدث ما لم يكن يتوقعه.
بعد عامين، عاد المرض مرة أخرى لـ داود، لكنه كان أكثر شراسة مما سبق، فانتقل من العظام إلى الأوعية الدموية، ليخيره الأطباء بين خيارات مصيرية يتعين على الشاب في مقتبل عمره أن يتخذ قرار فيهما.
نسيب السرطان ينتشر لباقي الجسم أو نعمل بتر للقدم، كان على داود صاحب الـ 19 عاما، أن يتخذ قراره.
والدة داود تكشف رحلته مع علاج السرطان
والدة داود محمد عادل، قالت لـ القاهرة 24: هو جاله سرطان في العظم سنة 2022، واتعالجنا وخلص العلاج الكيماوي، وبعدين المرض اترد تاني في نفس المكان بالعظم، الدكاترة قالوا لازم يحصل بتر في الجسم عشان الورم اتنقل من العظم إلى الأوعية الدموية وده في خطورة في إنه ينتشر في أجزاء أخرى من الجسم.
وأضافت: قالوا لنا إن لازم يحصل بتر للرجل أو احنا مش ضامنين إن الورم ينتقل إلى باقي الجسم، داود خد خطوة شجاعة ووافق على بتر قدمه.
وتابعت: هو في الوقت ده كان على تواصل بمحمد عبد المنعم لاعب النادي الأهلي سابقًا، ولما عرف دعمه بفيديو ومن هنا بدأ قصته تنتشر والناس عرفت قصته وبدأوا يدعموه، وتامر حسني كمان عمله فيديو وبوست علشان يشجعوه، وفنانين وبلوجرز كتير دعموه.
وبالفعل أجرى داود عملية بتر القدم في أغسطس الماضي، وما زال الشاب في رحلة التعافي من العملية، ولكن التأثير الإيجابي للدعم الذي حصده دفعه للتفكير في البدء في رحلة لدعم محاربي السرطان في رحلة علاجهم عن طريق السوشيال ميديا.
أوضحت والدة داود: داود عمل عملية البتر في شهر 8، ومستنين الجرح يخف تمامًا علشان نعمل رجل صناعية، وهو بدأ في محتوى على السوشيال ميديا عشان يشجع كل الشباب اللي مروا بنفس رحلته يكملوا علاجهم ويحاربوا السرطان.
