ابنة التيك توكر وحش الكون خلال التحقيقات: لما التفاعل كان بيقع كنا بنلبس ملابس خفيفة وشفافة |خاص
يواصل القاهرة 24، نشر نص التحقيقات في قضية التيك توكر وحش الكون، والتي حملت رقم 1437 لسنة 2024، تفاصيل اتهامها بالتحريض على الرذيلة والفجور والفسق، واستغلال ابنتيها القصر عبر مواقع التواصل الاجتماعي، وذلك بهدف التربح المادي وزيادة المتابعين.
التحقيقات مع وحش الكون وبناتها
وقالت ف. أ، ابنة المتهمة، في التحقيقات: أنا عندي 16 سنة وعايشة أنا وأختي وجدي أبو ماما، وبابا منفصل عن ماما من حوالي 3 سنين، والانفصال ده مكنش طلاق، ماما كانت غضبانه من بابا وسابت البيت عشان هو كان صعب ومش بيصرف على البيت، وماما أخدتني أنا وأختي ورحنا على بيت جدو في محافظة الإسكندرية، لإن احنا كنا عايشيين مع بابا في الأول بمحافظة البحيرة، ومن ساعة الانفصال بابا مش ييسأل علينا ولا بيكلمنا واحنا محصلش بنا أي تواصل وماما من حوالي كام شهر رفعت دعوى خلع وكسبت القضية.
وأضافت: المعيشة كانت صعبة لأن بابا مش بيصرف علينا ولا بيبعت لماما أي فلوس، وماما مش بتشتغل ولا معاها أي تعليم عالي، وجدو كبير في السن وشغال بيمسح عربيات في الشارع وبيكسب 50 جنيه في اليوم، وهي الفلوس دي مش هتكفينا كلنا، ومكناش عارفين نشتري أي حاجه من اللي نفسنا فيها، ومن فترة فكرنا في كسب الفلوس من على النت، وساعتها دورت على فيديوهات ازاي اكسب فلوس من على النت وشفت فيديوهات على تطبيق تيك توك ومن طريق البث المباشر، وقلت لماما إن ممكن نكسب فلوس من على تطبيق تيك توك علشان نحسن حياتنا، وساعتها ماما ماكنتش مصدقة، وأنا شرحت ليها القصة وبدأنا نجرب نعمل بث على تيك توك، وأول بث كان على قناة اسمها برنسيسة اسكندرية، والقناة تم غلقها، والبث كان عبارة عن ظهورنا احنا الـ3 وتقول اسامي المتابعين وتشكرهم بس لما القناة اتقفلت عملنا قناة جديدة باسم وحش الكون.
وتابعت: لما فكرنا في الموضوع ملقيناش أي محتوى نعمله غير إننا نقول أسامي المتابعين والداعمين اللي بيدعمونا في البث في البداية، وأول ما بدأ التفاعل مكنش كتير وكنا محتاجين نفتح بث كتير علشان نزود التفاعل والمشاهدين يدعمونا بهدايا واحنا نحولها لفلوس.
واستطردت: البث بتاعنا كان كله عبارة عن إننا بنطلع احنا الـ3 مع بعض أنا وأمي وأختي، وكنا لابسين وحاطين مكياج وبنتفاعل مع الداعمين ونقول أسمائهم ونكلمهم في أي حوارت وكنا بنبقى قاعدين بلبس البيت واخدين راحتنا في البث، وفي آخر كل بث التيك توك بيظهر ليك الهدايا اللي وصلت بعد خصم الشركة نصف المكسب وبيقدر قيمتها بالدولار، وفي الآخر يتحول على حساب بنكي بإسم ماما في بنك الإسكندرية، وفي البداية كان لبسنا عادي عبارة عن لبس خروج لكن لما كان البث واقع كنا بنلبس لبس خفيف وشفاف ونحط مكياج عشان البث يزيد ويظهر ويحصل عليه تفاعل كبير.
