اعترافات الطالب المتهم بقضية سرقة تابلت وزارة التعليم: أنا مجرد سواق وعامل بوفيه ضحك عليه| تحقيقات
ينفرد القاهرة 24 بنشر التحقيقات في القضية رقم 10267 لسنة 2024 جنح أول، والمعروفة إعلاميًا بسرقة 1100 تابلت من مقر وزارة التربية والتعليم بمدينة مبارك التعليمية بالسادس من أكتوبر.
تحقيقات قضية سرقة تابلت وزارة التربية والتعليم
وجاءت أقوال المتهم الثاني في واقعة سرقة 1100 تابلت تابعة لوزارة التربية والتعليم، وهو طالب يعمل كسائق على سيارة أوبر ملك شقيقته كالآتي:
س: ما هو قولك فيما هو منسوب إليك من أنك متهم بالاشتراك بطريق المساعدة مع آخر محمود. م - في سرقة المنقولات أجهزة الحواسيب اللوحية المبينة بالأوراق وصفًا وقيمًة والمملوكة لوزارة التربية والتعليم وكان ذلك من داخل مكان مسور على النحو المبين بالأوراق؟
ج: محصلش.
س: ما الذي حدث إذن وما هي ظروف ضبطك؟
ج: اللي حصل أنا طالب وبشتغل على عربية أختي أوبر، وبالصدفة اتعرفت على اللي اسمه محمود.م، وبقى يكلمني لو محتاج توصيله لمكان أو كده، وهو فهمني إنه شغال في الوزارة وإنه تبع جهة سيادية، وكان في الأول بيحاسبني باليوم لما أوصله أو كده، وبعدين بقى بيحاسبني شهري بيديني 20 ألف جنيه في الشهر مقابل العربية بالسواق، وبعدين فترة طلب مني أروح معاه عند المدينة التعليمية في أكتوبر، وقالي إنه هيجيب حجات من هناك يحملها في العربية وأنا قولتله مش مشكلة مدام حجات مش تقيله هتأذي العربية، وهو قالي لا دي بطاريات، وروحت معاه هناك، ولما روحنا لقيت المكان كله عارفه وكنا بنزل زجاج العربية ويشاور للناس بس فيفتحوله السكة، وده خلاني أصدق إن مفيش أي حاجة غلط.
وأضاف الطالب المتهم في قضية سرقة تابلت وزارة التربية والتعليم: وبعدين جاب من هناك كراتين أنا مكنتش عارف هي فيها إيه، وقالي إحنا هنروح نودي الحجات دي عند ناس، ووصلته بالكراتين دي لغاية ميدان لبنان وقالي الباشا هياخد مني الحاجة دي هناك، وبعدين مشيت، وكرر المشوار ده مرة كمان، وبس والباقي كانت كلها مشاوير ثانية وكان بيفهمني دايمًا إنه بيقابل ناس رُتب وكده، وإمبارح أنا كنت في البيت نايم، لقيت الشرطة جت ودخلوا البيت محدش أتكلم معايا في حاجة، وركبوني عربية بوكس، ولقيتهم بيقولولي فين أجهزة التابلت، قولتلهم مش فاهم أي حاجة، قالولي تعرف محمود محمد، قولتلهم أه أنا بشتغل معاه سواق بالعربية بتاعة أختي، ومكنتش فاهم أي حاجة لغاية لما خدوني القسم ساعتها فهمت إن محمود ده عامل بوفيه وإنه سرق حاجات من المدينة التعليمية، وأنا مكنتش فاهم أي حاجة.
س: متى وأين حدث ذلك؟
ج: أنا اتقبض عليا يوم 15 سبتمبر الساعة 5 مساء، من البيت بتاع والدي، في مركز منشية أبو عمر، ملاحة أبو وحش، الشرقية.
س: ومن كان برفقتك آنذاك؟
ج: كان معايا أهلي كلهم.
س: وما هي طبيعة العلاقة فيما بينك وكل من المتهمين هاني. ك، ومحمود. م، وأحمد. م؟
ج: أنا معرفش أي حد من الناس دي.
س: وما هي طبيعة العلاقة فيما بينك وبين كل من المتهمين محمود. م، وحسام الدين. م؟
ج: أنا معرفش أي حد من الناس دي.
س: وما هي طبيعة العلاقة فيما بينك وبين كل من المتهمين محمود.م، وحسام الدين.م، ومحمد.ح، وحازم. ع، ورفعت. ص ومحمد. س؟
ج: أنا معرفش غير محمود بس وعرفته بالصدفة وكان بيطلبني في شغل سواقة ومفهمني إنه شغال في جهة سيادية.
س: ما قولك فيما قرره أحمد حسنين بالمحضر رقم 10267 لسنة 2024 جنح أول أكتوبر؟
ج: أنا والله ما عرفت أي حاجة عن الكلام ده غير امبارح في القسم.
س: وما قولك فيما أتبعه سالف الذكر بشهادته لدى سؤاله بتحقيقات النيابة العامة؟
ج: أنا معرفش أي حاجة عن الموضوع ده.
س: هل من ثمة حديث دار فيما بينك وبين سالف الذكر؟
ج: لا هم فضلو يقولولي فين الحاجة هات اللي عندك قولتلهم مش معايا حاجة، دخلوا فتشوا البيت والعربية ملقيوش حاجه، وخدوني برضو.
س: وهل من ثمة تفتيش الصرف لشخصك؟
ج: أيوه فتشوني.
س: وما الذي أسفر عنه ذلك التفتيش؟
ج: مالقيوش غير تلفوني ومحفظتي.
س: ما قولك في المضبوطات أجهزة الحواسيب اللوحية والمبالغ المالية السالف فضها في مواجهتك وعرضها عليك على النحو الثابت بصدر التحقيقات؟
ج: لا معرفش أي حاجة عن الحاجات دي.
س: ملك من السيارة المضبوطة ط هـ ل ٣٩٥٣؟
ج: دي عربية أختي وهي بتدهاني وأوقات بشتغل عليها أوبر.
س: هل يوجد لك ثمة معرفة أو خلافات فيما بينك وبين الرائد محمد سكر معاون المباحث؟
ج: لا خالص.
س: وما قولك فيما اتبعه بالمحضر رقم 15 أحوال، المحرر بضبطك تنفيذًا لأمر النيابة العامة بالضبط والإحضار؟
ج: والله ما حصل الكلام ده، ولا حد أتكلم معايا وأنا مقولتش الكلام ده خالص.
س: هل تم ضبطك في ثمة قضايا مماثلة من قبل؟
ج: لا يا فندم.
س: هل لديك ثمة سوابق جنائية؟
ج: لا الحمد لله
س: أنت متهم بالاشتراك بطريق المساعدة مع آخر محمود. م في سرقة المنقولات أجهزة الحواسيب اللوحية المبينة بالأوراق وصفًا وقيمة والمملوكة لوزارة التربية والتعليم وكان ذلك من داخل مكان مسور على النحو المبين بالأوراق؟
ج: محصلش.
