مدير تسويق كوكو آند إس المتهم بسرقة 1100 تابلت: صاحب المحل هرب على الصين وأنا مش مسئول| خاص
ينفرد القاهرة 24 بنشر التحقيقات في قضية سرقة 1100 تابلت من مقر وزارة التربية والتعليم، بمدينة مبارك التعليمية، بمدينة السادس من أكتوبر، والتي كشفت عن تورط أصحاب محلات كوكو آند إس، وكذلك أصحاب فاترينات موبايلات بشارع عبد العزيز، وطالب بالجامعة، وعامل البوفيه العقل المدبر لواقعة السرقة.
تحقيقات قضية سرقة تابلت وزارة التربية والتعليم
وجاءت أقوال المتهم الرابع محمد.ج، مدير تسويق بمحلات كوكو آند إس، فرع الوراق أمام رجال التحقيق كالتالي:
س: ما قولك فيما هو منسوب إليك من أنك متهم بإخفاء منقولات أجهزة الحواسيب اللوحية المبينة بالأوراق والمملوكة لوزارة التربية والتعليم - حال كونها متحصلة عن واقعات سرقة مع علمك بذلك على النحو المبين بالأوراق؟
ج- محصلش
س: ما الذي حدث إذن وما هي ظروف ضبطك وعرضك علينا؟
ج: اللي حصل إن أنا شغال في محل تليفونات اسمه كوكو آن إس فرع الوراق، ولقيت ظابط دخل عليا المحل وكان معاه أمناء شرطة، وسألني على صاحب المحل قولتله إن هو مسافر الصين، راح سألني على أجهزة تابلت، قولتله يا فندم التابلت خلصان بقاله يومين، والمحل قدام حضرتك لو عايز تفتشه اتفضل، راح قالي مين مسؤول مكان صاحب المحل، قولتله مفيش دلوقتي غيري، وقالي دي أجهزة مسروقة من وزارة التربية والتعليم، وأنا قولتله والله أنا ما أعرف حاجة عن الموضوع ده وأنا شغلتي إني مصور بس للأجهزة اللي بتتباع على السوشيال ميديا، فخد بطاقتي وقالي خلاص تعالى معايا على القسم لحد ما جيت على هنا.
س: متى وأين حدث ذلك؟
ج: أنا اتقبض عليا يوم 8 سبتمبر 2024، من المحل اللي أنا شغال فيه كوكو آن إس الوراق في الجيزة.
س: ومن كان برفقتك آنذاك؟
ج: كل اللي كانوا معايا في المحل بنات.
س: وما هي طبيعة العلاقة فيما بينك وكلًا من المتهمين هاني.ك، ومحمود.م، وأحمد.م؟
ج: أنا معرفش أي حد في الناس دي.
س: ما هي طبيعة العلاقة فيما بينك وبين كلًا من المتهمين محمود م. عامل البوفيه، وحسام الدين.م، ومحمد.ح، وحازم.ع، ورفعت ص، ومحمد.س؟
ج: أنا معرفش أي حد في الناس دي.
س: وما مدى علمك كون تلك الأجهزة اللوحية متحصلة عن واقعات سرقة؟
ج معرفش حاجة عنها والله.
س: ما قولك فيما قرره المدعو أحمد.ح، إذا بالمحضر رقم 10267 جنح أول أكتوبر.
ج: أنا والله ما عرفت الكلام ده غير لما حد بلغني بأن فيه مشكلة، وساعتها أنا اللي روحت القسم بنفسي، وخدت معايا الراجل اللي أنا خدت منه الأجهزة عشان لو فيه أي مشكلة، ولما عرفت إن الأجهزة مسروقة رجعت كل الأجهزة اللي عندي.
س: وما قولك فيما أتبعه سالف الذكر بشهادته لدى سؤاله بتحقيقات النيابة العامة؟
ج: أنا معرفش أي حاجة عن الموضوع ده.
س: ومن هو القائم على ضبطك تجديدًا؟
ج: أنا روحت لرئيس المباحث بنفسي.
س: هل من ثمة حديث دار فيما بينك وبين سالف الذكر ؟
ج: هو سألني عن الأجهزة وإيه اللي حصل، وقولتله نفس اللي حكيته دلوقتي.
س: وهل من ثمة تفتيش لشخصك؟
ج: أيوه فتشوني.
م وما الذي أسفر عنه ذلك التفتيش؟
ج: مكنش معايا أي حاجة.
س: ما قولك في المضبوطات أجهزة الحواسيب اللوحية والمبالغ المالية السالف فضها في مواجهتك وعرضها عليك على النحو الثابت بصدر التحقيقات؟
ج: أنا والله ما أعرف أي حاجة عن الموضوع ده.
س: هل يوجد لك ثمة معرفة أو خلافات فيما بينك وبين معاون المباحث؟
ج: لا خالص.
س: وما قولك فيما اتبعه بالمحضر رقم 15 أحوال، المحرر بضبطك تنفيذًا لأمر النيابة العامة بالضبط والإحضار؟
ج: أنا معرفش الظابط ده خالص، وأنا والله خدت الأجهزة من واحد اسمه "بندق" ومعرفش أي حاجة عن أن الأجهزة دي مسروقة.
س: هل تم ضبطك في قضايا مماثلة من قبل؟
ج: لا يا فندم.
س: هل لديك ثمة سوابق جنائية؟
ج: لا الحمد لله.
س: أنت متهم بإخفاء منقولات أجهزة الحواسيب اللوحية المبينة بالأوراق وصفًا وقيمة والمملوكة لوزارة التربية والتعليم - حال كونها متحصلة عن واقعات سرقة مع علمك بذلك على النحو المبين بالأوارق؟
ج- محصلش.
