محمود فتح الله: مش كل واحد لعب كرة ينفع يتكلم.. والدوري ميستاهلش كل البرامج دي
انتقد محمود فتح الله نجم الزمالك السابق، الأداء الإعلامي الرياضي وظهور بعض اللاعبين القدامى في البرامج التليفزيونية خلال الفترة الحالية، بهدف الحصول على مشاهدات عالية.
محمود فتح الله ينتقد أداء الإعلام الرياضي
قال محمود فتح في تصريحات تلفزيونية: إحنا بنعيش واقع سيئ ومش كل واحد لعب كرة يبقى ممكن يتكلم ونسمعه، ومش كل واحد لعب كرة يكون عنده برنامج، والقنوات زادت ومش عارفين يعملوا إيه، فبيستضيفوا ناس تتكلم في أي حاجة.
وأردف: الدوري المصري ميستاهلش البرامج دي كلها، والموضوع بقى سهل والناس بتسمع أي حد، وهناك لاعبين عندما تبتعد عنهم الأضواء فضلوا الظهور في البرامج وبيقولوا أي كلام لمجرد التريند ويرجعوا يتسمعوا تاني من الجماهير.
وشدد فتح الله: وأنا مش هلوم الناس دي لإنهم لقوا الطريق الفاشل هو الأسهل، لكن هلوم اللي بيجيبهم ويعملهم برامج تلاقيه برا الاستوديو أفكاره كويسة وشخص عاقل بس بيتحول قدام الشاشة عشان يجيب مشاهدات.
واختتم محمود فتح الله تصريحاته: أتمنى الوسط الرياضي، والأداء الإعلامي يقتصر على المختصين فقط.
يذكر أن أحمد حسام ميدو، سبق وانتقد التغطية الإعلامية للرياضات الفردية والألعاب الأخرى خلال السنوات الأخيرة، مطالبًَا بضرورة سن قانون جديد في الإعلام الرياضي.
وقال ميدو في تصريحات صحفية: كل منصة إعلامية بيكون لها طابع وأسلوب عمل مختلف، لكن السوشيال ميديا بيكون ليها مساحة أكبر من الحرية، لكني أريد أن أشير إلى شيء مهم.
وتابع: في كل دول العالم يتم فرض أو نص قانون على المنصات الإعلامية بضرورة تخصيص 20% من محتواها للألعاب الأخرى، وكل الصحف في بريطانيا لا بد أن يكون بها صفحة على الأقل مخصصة للألعاب الأخرى.
وواصل ميدو تصريحاته: إحنا عندنا أبطال كتير جدًا في مصر مظلومين إعلاميًا، مينفعش أتفاجئ بوجود بطل مصري زي أحمد الجندي وناس كتير متعرفش بطلة عظيمة مثل نور الشربيني.
واختتم ميدو تصريحاته: لا بد أن يكون هناك قانون في مصر بإلزام وسائل الإعلام بتغطية الألعاب الأخرى، عندنا أبطال مظلومين ويستحقوا الاهتمام أكثر من لاعبي كرة القدم.
