إيناس الدغيدي: محمود حميدة فنان زيادة عن اللزوم.. ومعندوش حياة تانية غير الفن
تحدثت المخرجة إيناس الدغيدي، عن علاقتها بالفنان محمود حميدة، والمقدمة التي قالتها عنه خلال تقديمها تكريمه في مهرجان الجونة السينمائي بدورته السابعة.
وقالت إيناس الدغيدي، في لقائها مع القاهرة 24، على هامش فعاليات مهرجان الجونة السينمائي: قلت كلمتي في افتتاح الجونة عن محمود حميدة من قلبي لأني بحبه وبدأنا مشوارنا مع بعض وكان عندي معرفة كاملة بالحياة الفنية لمحمود حميدة، وهو فنان زيادة عن اللزوم لو كنا بنقول في أحمد زكي كنا بنقول كمان في محمود حميدة.
وتابعت إيناس الدغيدي: أنا اشتغلت مع محمود حميدة في الأول فيلم ديسكو ديسكو ولكن مكنش كبير وكان معتمد أكتر على الشباب، ولما جيت أعمل فيلم دانتيلا لقيت أن محمود حميدة كان لايق على الدور جدًا لأنه كان بيتعامل مع المرأة على أنه بياخد منها اللي هو عايزه، والناس بتحب له الفيلم وهو مش فيلم مناسبات ممكن تتفرج عليه أي وقت.
إيناس الدغيدي: محمود حميدة مالوش عداوات
وأضافت إيناس الدغيدي: أنا شايفة أن محمود حميدة شخصية مختلفة وهو السهل الممتنع، وهو دايمًا الأول يقول لأ، ولكن لأ دي لا تعني لأ ولكن ده يعني له التفكير والمناقشة والوصول للحقيقة، محمود حميدة مُسالم جدًا ومعندوش عداوات، أنا شايفة أنه شخصية فنية كاملة زي ما بيقولوا، ومعندوش حياة تانية غير الفن.
