المتهم بقتل نجل صاحب مقهى أسوان: قتلته عشان أخد حقي وأخلص منه| خاص
كشفت التحقيقات، تفاصيل جديدة في قضية قتل نجل صاحب مقهى أسوان، والذي أنكر ارتكابه واقعة القتل العمد؛ لأن المجني عليه هو من ذهب إليه داخل المحل الذي يعمل به، وحاول الاعتداء عليه.
قتل نجل صاحب مقهى أسوان
وحصل القاهرة 24 على التحقيقات في واقعة اتهام ناصر. ص، 28 سنة، حاصل على بكالوريوس نُظم ومعلومات إدارية، بإنهاء حياة شخص وسط الشارع بعدة طعنات، وبسؤال المتهم حول هل من ثمة خلافات فيما بينكم؟ أجاب: اه كان في خلافات بنا.
س: ما هي طبيعة تلك الخلافات؟
ج: في خلافات بيني وبين محمد كتير، ومن حوالي 5 سنين حصلت مشكلة، واتخانقا مع بعض وضربنا بعض، وبعدها الناس جات حاشت بينا، والموضوع خلص ومحمد كان واخد حصة في العمارة اللي محل العصير بتاعي فيها في شارع السلة بالكوربة، مكنتش عايز يكون ليه حصة في العمارة اللي أنا فيها، وكان في مشاكل كتير بينه وبين صاحب العمارة، ولما كنا بنشوف بعض كان بيحصل ساعات مشادات بنا لكن الناس كانت بتحوش.
س: ومتى نشأت تلك الخلافات؟
ج: من حوالي خمس سنين تقريبا
س: وإلى أي مدى تطورت تلك الخلافات؟
ج: كان بيحصل بينا مشاكل واتخانقنا مع بعض وضربنا بعض من 5 سنين، والناس حاشت ما بنا ولما كنا بنشوف بعض كان بيحصل ساعات مشادات بنا لكن الناس كانت بتحوش
س: ما هي كيفية ارتكابك لتلك الواقعة؟
ج: أنا لقيت ماشي قدام محل العصير بتاعي وعمال يزعق؛ لأن في خلافات سابقة بنا فأنا خرجت من المحل، وكان معايا مطوة في جيبي وكنت قرفان منه ومن المشاكل اللي بتحصل بنا طلعت المطوة من جيبي، ودخلت عليه وضربته بيها أكثر من ضربه ومش فاكر كام ضربه تقريبًا ووقع على الأرض وفضلت أضرب فيه بالمطوة ووقعت فوقه على الأرض، ومحستش بنفسي لقيتني عمال أغرز المطوة في بطنه، والناس أتلمت وقعدت تحوش وأنا مكنتش عايز أسيبه، وفضلت أضرب فيه لحد ما الناس حاشتني وقعدت الأهالي يضربوا فيَّ بالكراسي، عشان أقوم من عليه لكن فضلت أضرب فيه بالمطوة، وبعدها قولتله أنت اللي وصلتني إني أعمل فيك كدا، وبعدها الناس شالتني وقومتني من عليه.
س: متى بدرت إلى ذهنك تلك الفكرة؟
ج: لما لقيت محمد ماشي قدام محل العصير بتاعي وعمال يزعق طلعت عليه بالمطواة وضربته وجاتلي فكرة إني أضربه أول ما شوفه.
س: ما هي كيفية إعدادك للفكرة وكيف نفذتها؟
ج: أنا لقيته داخل عليا وعمال يزعق طلعت المطوة من جيبي وضربته بيها.
س: وما هو المخطط الإجرامي الذي أعددته لتنفيذ تلك الفكرة؟
ج: أنا كنت زهقان منه ومش طايقه، لقيت نفسي بطلع المطوة من جيبي وبضربه بيها وفضلت أضرب فيه كتير، والناس كانت عماله تحوشني، وأنا مش راضي أبطل ضرب فيه بالمطوة.
س: وما هو السلاح أو الأداة التي استخدمتها في ذلك التعدي؟
ج: مطوة قرن غزال.
س: ما هو قصدك من التعدي على المجني عليه وإحداث إصابته التي أودت بحياته؟
ج: أنا كنت زهقان منه وعايز أضربه بالمطوة وأخلص عليه.
س: وما قصدك من ارتكاب الواقعة تحديدا؟
ج: كان قصدي أخد حقي منه واخلص عليه.
