إمام عاشور يكشف كواليس حديثه مع شيكابالا في مباراة نهائي كأس مصر: قال لي زعلان منك
كشف إمام عاشور، لاعب النادي الأهلي، كواليس حديثه مع شيكابالا قائد الزمالك في نهائي كأس مصر النسخة الماضية والتي أقيمت في السعودية.
تصريحات إمام عاشور
وقال إمام عاشور في تصريحات تلفزيونية: شيكابالا قالي أنا زعلان منك، قولتله ليه، قالي عشان بكلمك ومابتردش، قولتله لا انا كلمتك أكثر من مرة وأنت ماردتش.
وتابع: بعد الكلام ده قولت لـ شيكابالا، شوف دونجا عشان هخليه ياخد الإنذار التاني وهينطرد، بعد ما كان كل شوية بيضرب فيا في الملعب.
وأردف قائلا: أنا اعترف بأخطائي وأنا أخطأت في حق رموز الأهلي، واعتذرت لهم جميعا عن أي شيء بدر مني.
وفي السياق ذاته، حرص إمام عاشور لاعب الأهلي على الكشف عن كواليس رحيله من نادي الزمالك للاحتراف الخارجي وتحديدًا إلى صفوف فريق ميتلاند الدنماركي، وظروف تسجيل الفيديو الشهير الذي ظهر فيه مع مرتضى منصور رئيس النادي السابق، وحقيقة وجود كوبري لانتقاله إلى صفوف الأهلي.
وأضاف نجم الأهلي خلال تصريحاته: وأنا في الزمالك جالي كذا عرض منهم في إسبانيا، مكنتش أعرف حاجة عن عرض ميتلاند، بس قررت أكمل وجددت في الزمالك ساعتها ومعرفش العقد أتوثق ولا لا.
وأكمل إمام عاشور: لقيتهم بيكلموني الساعة 12 بالليل عايزينك دلوقتي، قالولي بالحرف الواحد أنت هتمشي، فيه نادي اسمه ميتلاند هتروحه قلتلهم مفيش مشكلة، روحت تاني يوم النادي لقيت العقود وكل حاجة هما مجهزينها، قلتلهم مفيش مشكلة وروحت مضيت وعملت بعدها اللقاء على قناة الزمالك.
واختتم لاعب الأهلي ومنتخب مصر تصريحاته قائلا: لما كنت في ميتلاند ورجعت القاهرة أتعالج لقيت أحمد يحيى بيقولي أمير توفيق عايز يطمن عليك، الصراحة كلمني ومقاليش أي حاجة تخص الأهلي خالص، وهذا ما ينفي فكرة وجود تدخل من الأهلي لرحيلي من الزمالك، زعلان إن خطوة ميتلاند مكملتش، بس الحمد لله ربنا عوضني بالأحسن، أنا في أحسن نادي في إفريقيا وأي حد يتمنى يلعب في الأهلي.
