سبني بأمي.. أقوال طبيب عين شمس المعتدى عليه من محمد فؤاد في التحقيقات| خاص
يستكمل القاهرة 24، نشر التحقيقات في قضية مشاجرة مستشفى عين شمس، بين الفنان محمد فؤاد، والطبيب مصطفى. أ، في 20 أغسطس الماضي.
مشاجرة مستشفى عين شمس
واستجوبت جهات التحقيق الطبيب وجاءت كالآتي:
ما هو الحوار الذي دار بينك وبين سالف الذكر؟
بعد ما روحت إلى المريض على السرير بتاعه وهو كان عامل رسم قلب خارج المستشفى وسألته عن طبيعة الألم اللي عنده، وإنه كان بيعاني من أمراض القلب أو السكر أو الضغط فقالي أنا عندي الألم بالصدر من الساعة 12 بليل تقريبا، وإن هو مدخن وكان عمل دعامة قبل كده في الشريان الأورطى وبعد كدة، بصيت في رسم القلم اللي كان عمله بره المستشفى، لقيت في شبه حفظه في الشريان التاجي، عملنا رسم قلب جديد عشان أشوف الحمالة وصلت لإيه، وإنه لازم يتعمله قسطرة عشان يركب دعامات وبلغت واحدة ست كانت معاه إنه لازم يدخل غرفة العمليات عشان يتعمله قسطرة والمريض كان سامع الكلام ده.
ما تشخيصك حالة المريض عبد العزيز فؤاد؟
لقيت فيه جلطة في الشريان التاجي ومحتاج يدخل عمليات يعمل قسطرة عشان يركب دعامات وده كان واضح في رسم القلب الخارجي وكمان كان واضح في رسم القلب اللي انا عملتهوله لما دخل المستشفى.
هل كان المريض سالف الذكر متعاطيا أدوية من الخارج لإزالة تلك الجلطة؟
أيوه هو قالي خد 4 أقراص اسبرين و4 أقراص بلاقيكس ودول يعملوا على زيادة سيولة الدم
ما التصرف الذي بدر منك عقب التشخيص سالف الذكر؟
خرجت من الغرفة اللي فيها المريض وروحت على الاستقبال علشان اكتب التقرير اللي هيخده أهالي المريض علشان يعمله إجراءات تسجيل الدخول، وبالفعل الست اللي كانت مع المريض خدت مني التقرير وخرجت بره علشان تعمل إجراءات تسجيل الدخول، وأنا خدت تذكرة المريض اللي مكتوب فيها اسمه وسنه واللي دخل بيها الاستقبال علشان اكتب تقرير طبي بالحالة واحتياجاتها
صف لنا كيفية التقائك بالمدعو محمد فؤاد؟
هو في نفس الوقت وأنا بكتب التقرير ده كنت برن على الاستشاري اللي هيعمل عملية القسطرة وفي الوقت ده لقيت واحد دخل سلم عليا وأنا سلمت عليه ومكنتش أعرف هو مين لأني كنت مشغول بكتابة التقرير والاتصال بالاستشاري علشان سرعة إجراء العملية.
صف لنا طبيعة التعدي اللفظي؟
هو سبني بأمي.
