منة عدلي القيعي: أحمد سعد ومراته عائلتي.. ويا رب كل أغانيه الناجحة تبقى معايا
تحدثت الشاعرة الغنائية منة عدلي القيعي، عن علاقتها بالفنان أحمد سعد، والتي حققت العديد من النجاحات رفقته في العديد من الأغاني.
وقالت منة عدلي القيعي، في لقائها مع القاهرة 24: أحمد سعد أخف دم في مصر وأحلى الأصوات في مصر، وهو من ألذ الناس اللي ممكن حد يشتغل معاها في الدنيا، هو صديق وصاحب مش هيتعوض ومش هيتكرر كتير، هو مراته وبناته أنا بعتبرهم عائلتي مش علاقة شغل.
وأضافت منة عدلي القيعي، موجهة رسالة لـ أحمد سعد: ربنا ينجحه أكتر ويرزقه وينجحنا سوا، ويا رب يا أحمد كل الأغاني الحلوة تعملها معايا.
منة عدلي القيعي: عملت أغنية أنا من غيرك لـ خطيبي
كما تحدثت منة عدلي القيعي، عن نجاح أغنية أنا من غيرك للفنان بهاء سلطان، وهي الأغنية الرسمية لـ فيلم الهوى سلطان، قائلة: بعتز بـ أغنية الهوى سلطان جدًا وربنا وفقنا، والفيلم كان حلو أوي إحنا شفناه وكان تحدي مش سهل لأننا كنا عارفين أن الفيلم هينجح والناس هتحبه، فكان لازم نعمل أغنية تكون على نفس مستوى الفيلم.
وأضافت منة عدلي القيعي: وأنا بألف أغنية بكون بفكر في الفيلم في المقام الأول وفي الشخصيات، ولكن لازم ألاقي نقطة التقاء بينها وبيني علشان يكون في مصداقية، علشان كده الناس بتحس بالأغاني بتاعتي، وأنا لسه مخطوبة قريب وعزيز الشافعي زعقلي وقالي اكتبي كلمة لـ يوسف خطيبي، والأغنية ليوسف في الأساس.
