إيمي طلعت زكريا في ذكرى ميلاد والدها: عايشة على اسم أبويا.. وأوافق على تقديم سيرته الذاتية بشرط
أعربت الفنانة إيمي طلعت زكريا عن اشتياقها لوالدها، مطالبة من الجمهور الدعاء له بالمغفرة.
وقالت إيمي طلعت زكريا في تصريح خاص لـ القاهرة 24، في ذكرى ميلاد والدها، 18 ديسمبر، إنها تتذكره دائما، معلقة: عمري ما نسيت بابا وهو دائمًا معانا معندوش مواقف وحشة كأب أو كفنان أو كبني آدم على المستوى الشخصي ولو فضلت أتكلم عليه طول عمري هقول أشعار، هو كان بالنسبالي صديق وحبيب وكل حاجة ليا وساب الدنيا لكن موجود معانا بذكرياته وأعماله.
وأضافت: في ذكريات كتيرة بيني وبين والدي كنا دائما بنسافر مع بعض طول الوقت وموجودين معاه طول الوقت في التصوير أنا كنت مديرة أعماله وكان بيشاركنا شغله ويأخد رأيي في اختياراته، ويا ريت اللي يفتكره يدعيله، كان دائما بيقول لينا مقولة بكره تعرفوا قيمتي، وأنا عايشة على اسم أبويا.
وبشأن تقديم مسيرته في عمل فني، أوضحت إيمي طلعت زكريا: لو حد هيعمل سيرة ذاتية بشكل إيجابي ويوضح صعوبات مرضه أوافق عكس كده مفضلش.
وعلى جانب آخر، علقت إيمي طلعت زكريا مؤخرًا على حالة الجدل التي أثارتها خلال الساعات الماضية، بعد تصريحاتها بشأن معاناتها من الحسد والجن العاشق ووقف مشاريعها الفنية وكذلك الارتباط والزواج، واستعانتها بالعديد من المشايخ وصولًا إلى أمين الفتوى بالأزهر الشريف.
وقالت إيمي طلعت زكريا في تصريحات لـ القاهرة 24: بمناسبة كلامي عن الجن العاشق والحسد، كنت بوعي البنات ولكن أنا كويسة مفيش أي حاجة، بصلي وبعمل عمرة وعارفة ربنا، ومش مؤمنة بالجن العاشق أو المس.
إيمي طلعت زكريا: هتجوز قريب
وأضافت إيمي طلعت زكريا: أنا شايفة بنات كتير بتفكر في موضوع جوازي اتأخر بسبب إني معمولي عمل، أنا مش مؤمنة بكده ولكن أنا حبيت أوجه رسالة للبنات إللي بتغني في الحمام وتقف أمام المرآة عشان يخافوا شوية، ولكن الموضوع عندي ملوش أساس من الصحة.
