أحمد مراد عن تعاونه مع منى زكي في فيلم الست: احترافية ومفيش حد بيذاكر قدها
تحدث الكاتب أحمد مراد، عن تعاونه مع الفنانة منى زكي، في فيلم الست، الذي يتناول السيرة الذاتية لـ كوكب الشرق أم كلثوم.
وقال أحمد مراد، في لقائه مع القاهرة 24: منى زكي بتقرأ السيناريو كويس أوي، ولو عندها تساؤلات أو ملاحظات بنقعد نتناقش ونتكلم في كل حاجة، وبنستفيد كلنا من بعض سواء أنا أو هي أو المخرج مروان حامد.
وتابع أحمد مراد: الممثل عليه عبء كبير جدًا إنه يفك النص، ويستوعبه ويهضمه ويحول النص بطريقة مختلفة تمامًا عن اللي الجمهور متخيلها، هي كانت علاقة تعاون احترافية جدًا ومعتقدش إن في حد بيذاكر قدها.
أحمد مراد: منى زكي تعاني من الحكم المسبق
كما علق أحمد مراد، على انتقادات تقديم منى زكي، لـ السيرة الذاتية لـ أم كلثوم، قائلًا: اللي نزل مكنش البوستر بتاع فيلم الست، لما بفكر في رد فعل الناس بستغرب شوية لأنهم لسه متفرجوش.. بابلو سكوبار تاجر مخدرات مهم جدًا في كولومبيا اتعمل عنه عشرات المسلسلات.. هل أم كلثوم ميتعملش عنها غير عملين في الحياة؟، أعتقد ده شيء غريب شوية.
وأضاف: المسلسل العظيم اللي اتعمل كان حلو جدًا، ولكن كل جيل محتاج المسلسل أو الفيلم اللي يتكلم بـ لغته، وإحنا بنحاول نقدم سيرة هي أصلًا متخلصش في 10 مسلسلات، لأن قدرة أم كلثوم في حياتها كانت كبيرة أوي، وفيه زوايا كتير نتكلم فيها ونبرز حاجات لذيذة متشافتش قبل كده، أنا بدعو الجمهور يتأنى ويتفرج.
