سابقة طبية.. مستشفى دار الفؤاد يُقاضي مريضًا دخل الانتظار ولم يحصل على العلاج
حررت مستشفى دار الفؤاد، دعوى قضائية ضد شاب بسبب عدم سداد رسوم التسجيل الخاصة بها، في أثناء زيارته للمستشفى مع شقيقته المريضة، والتي استغرقت ساعة ونصف لم يحصل خلالها على أي خدمة علاجية، مما أثار الجدل عبر مواقع التواصل الاجتماعي بعد نشر فيديو بتفاصيل الواقعة.
مستشفى دار الفؤاد يُقاضي مريضًا دخل الانتظار ولم يحصل على العلاج
وكشف صاحب الواقعة المتهم في القضية ويُدعى محمد حسين في حديثه لـ القاهرة 24: من فترة روحت أنا وأختي المريضة مستشفى دار الفؤاد، وبعد ما دخلنا سجلنا أسماءنا في ورقة وقولنالهم المشكلة، قالوا الدكتورة هتيجي تشوفها، وكان بقالنا كتير أوي لحد ما زهقنا ومشينا عشان كانت تعبانة ومش قادرة، من كام يوم اتفاجئت بحد جاي من المحكمة معاه جواب تعويض بـ 3500 جنيه، وطبعًا الكلام متقالش لما كنا في المستشفى ومطلبوش مننا أي فلوس وقتها، لأنهم كتبوا أسماءنا في ورقة مش فاهم إزاي، واحنا ولا كشفنا ولا عملنا أي حاجة، ولا عملولنا خدمة صغيرة حتى، حسبي الله ونعم الوكيل فيكم، وربنا ينتقم منكم عشان بتمصوا دم الناس
وأضاف: الناس اللي بتتعامل مع مستشفى دار الفؤاد، ياريت تخلوا بالكوا ومتروحوش تاني للمكان ده، لما روحت أنا وأختي المستشفى اللي المفروض إنها مكان محترم، ويدوبك سجلت اسمي واسمها، وقعدنا في الاستقبال، وبعد ساعة ونصف من الانتظار ومعاملة سيئة جدًا، وبيكملونا كأننا بنشحت منهم، وطبعًا عشان أختي كانت تعبانة، خدتها وروحنا مستشفى تانية، ياريت محدش يتعامل معاهم خالص أو يروحلهم لأنهم معندهومش ضمير خالص ولا يعرفوا ربنا.
ولاقى الفيديو تفاعلًا واسعًا بين مستخدمي منصات التواصل الاجتماعي، حيث كتب صاحب حساب: الكلام عن حقيقة وعن تجربة فعلًا. مستشفى مش ممكنة بجد.
وأضاف مستخدم آخر: دي حقيقة، روحت هناك بابني كان دماغه اتفتحت، رفضوا يكتموا الدم أو يعالجوه إلا لما أدفع 10 آلاف جنيه.
قعدت أقولهم: طب عالجوه الأول، قالوا لي: لا، لما تدفعي، وخيطوا غرزتين بـ 3 آلاف جنيه.
