بعد تعافيه من الإصابة.. محمد عبد المنعم يعلن عودته إلى تدريبات نيس
أعلن محمد عبد المنعم مدافع فريق نيس الفرنسي، عودته إلى تدريبات فريقه، وذلك بعد تعافيه من إصابة قطع في الرباط الصيلبي.
محمد عبد المنعم مدافع نيس الفرنسي يعلن عودته إلى التدريبات
وقال عبد المنعم عبر حسابه الرسمي على فيسبوك: الحمد لله دائما وأبدا، النهارده أول يوم تمرين ليا بعد فتره هي الأصعب في حياتي، دخلتني في اكتئاب وتوتر من المستقبل، خلتني أشوف مستقبلي بشكل مختلف عن اللي كنت بحلم بيه.
وأضاف: بس تفكيري هنا طول الوقت مش هسيب حلمي، واني اقدر اعدي اي مرحله صعبه، حسيت بكمية الحب والتعاطف والدعم معايا لما حصلت الإصابة، وده اتأثرت بيه نفسيًا، بس في نفس الوقت، خلاني أحس بالمسؤلية.
وأوضح: كنت بشتغل وهدفي قدام عيني، وأن هرجع تاني، وأكون عند حسن الظن، ومن هنا وحسيت إن كل حاجة أنا وصلتلها مكنش شطارة مني، ده كانت ترتيبات ربنا ليا، قربت منه أكتر، حسيت بالرضا، وحسيت إن ربنا بيقولي متقلقش أنا جنبك ومش هسيبك فـ ارتحت، وهنا التفكير اتغير لما حسيت بالرضا.
وأكد: النجاح مهم جدا، بس الأهم منه هو علاقتك مع ربنا، ومن أهم النعم، الناس اللي بتحبك بصدق، واللي وجودهم في حياتك بيخليك انسان احسن.
وأكمل: اتعلمت أن أكون حامد من غير شروط أسعى وأشتغل وأعب بس في نفس الوقت احافظ على كنوزي الحقيقية أهلي وأصحابي والقلوب اللي بتقف جنبك في كل لحظة لأن دول اللي بيفضلوا يوم ما تتعب او تمرض او حته ترحل واللي بيفضل فعلا هو الذكري والدعوة الحلوة واللحظة اللي بتبقي اثر في قلب كل واحد، لأن الاستثمار الحقيقي هو الاستثمار في الذكريات بيخلي اللحظات تعيش فوق عمر الانسان.
وأتم: شكرا من قلبي لكل واحد افتكرني، وبعت كلمة أو دعاء لي، وجودكم حواليا بيكبر المعنى، ويطول عمر اللحظات الحلوة شكرا على دعمكم.
إصابة محمد عبد المنعم
تعرض الدولي المصري محمد عبد المنعم لإصابة قوية خلال مشاركته مع فريق نيس الفرنسي، في مواجهة باريس سان جيرمان، التي أقيمت يوم 26 أبريل 2025 على ملعب بارك دي برانس.
وأصيب عبد المنعم في الدقيقة 63 من عمر اللقاء، حيث سقط على أرض الملعب متأثرًا بالإصابة، قبل أن يغادر الملعب باكيًا محمولًا على نقالة، وسط قلق زملائه والجهاز الفني.
