مي فاروق: ناس معندهاش ربع موهبتي كانت بتنجح وأنا مش عارفة أتشهر.. والسر كان في حفل روائع الموجي
تحدثت المطربة مي فاروق، عن فترة انطلاقتها الفنية، موضحة أن مشاركتها في حفل روائع الموجي بموسم الرياض وتقديمها أغنية اسأل روحك لـ كوكب الشرق أم كلثوم، كانت نقطة فاصلة في حياتها الفنية، وذلك بعد العديد من المحاولات للظهور والشهرة بعالم الغناء.
وقالت مي فاروق، في تصريحات تليفزيونية: أنا قوية جدًا وده من ربنا مش شطارة مني خالص، وخلال 12 سنة في زواجي الأول كنت بعمل حفلات ولكن بحاول أعافر طول الوقت لأني عايزة أتعرف، وكنت بقول كتير بيني وبين ربنا يا رب لو أنت شايف أن لو هذه الموهبة اختبار ليا فأنا أضعف من أني اختبر، لأني مش عارفة أنجح ومش عارفة أتشهر وأنا عندي موهبة زي دي، وكل حاجة حواليا بتمشي تمام وناس معندهاش ربع الموهبة دي وبتنجح وأنا قاعدة مكاني مش عارفة أعمل إيه، وطلبت من ربنا لو أنت شايف كده اسحب الموهبة دي أنا مش عايزة أغني أنا تعبت، كانت فترة صعبة ومحبطة في كل حاجة.
وأضافت مي فاروق: ناس قفلت الباب في وشي كتير، واتقالي أنتي بتغني قديم وده مش هينفع وعمرك ما هتنجحي، طب ما أنا بغني قديم علشان معنديش أغاني بتاعتي، عايزة حد يقولي تعالي هنعملك أغاني، وفي ناس قالتلي عمرك ما هتنجحي ولفت الأيام وقالوا كنا بنقول هتبقى أهم واحدة.
وعن انطلاقتها الفنية، فأوضحت مي فاروق: غنيت اسأل روحك في حفل روائع الموجي، والحقيقة أني معملتش حاجة وكنت مريضة في الحلفة دي، أول ما نزلت من على المسرح لقيت السوشيال ميديا كلها بتتكلم عليا، ربنا أراد أنه يشاور عليا في حفل روائع الموجي، طول عمري بغني وبغني لـ أم كلثوم، ولكن ربنا قرر لي دلوقتي أن تبقى دي النقطة اللي هتوريلي كل الحاجات الحلوة.
