سحر رامي: اتنين غيرنا أعادني للجمهور.. وعمري ما أعتزل الفن وغيابي مش بإرادتي| حوار
تُعد الفنانة سحر رامي واحدة من الفنانات اللاتي تركن بصمة واضحة في الدراما المصرية، بفضل حضورها الهادئ وأدائها الصادق القريب من القلب على مدار مشوارها الفني، قدمت أدوارًا متنوعة بين الاجتماعي والإنساني، وتميزت بقدرتها على تجسيد شخصية الأم والمرأة القوية ببساطة وعمق بعيدًا عن المبالغة، آخرها مشاركتها في مسلسل اتنين غيرنا والتي تظهر خلاله بدور والدة الفنان آسر ياسين.
وتصدرت المشهد في مسلسل اتنين غيرنا، وذلك بحديث الجمهور بأنها أصبحت جزء حقيقي من الحياة اليومية، لا مجرد شخصية على الشاشة، ورغم فترات الغياب التي مرت بها، ظلت محتفظة بمحبة الجمهور وتقديره، خاصة أن أدوارها غالبًا ما تتسم بالدفء والتأثير.
لهذا الأمر تواصل القاهرة 24، مع الفنانة سحر رامي، لـ حديثها عن مشاركتها من البداية في اتنين غيرنا، والكيمياء الواضحة بينها وبين فريق التمثيل، على رأسهم دينا الشربيني وآسر ياسين، في أجواء يغلب عليها الانسجام والكيمياء، جانب الحديث عن فترة غيابها والعديد من الأمور الخاصة بها.
في البداية.. حدثينا عن ردود الفعل التي تلقيتيها من الجمهور خاصة بعد حديث الجمهور أنك تصغرين ؟
الحمد لله ردود الفعل من الجمهور أسعدتني وكلها كانت حلوة جدًا، والناس قالت إني صغرت وده أسعدني وأي كلمة حلوة بتفرق معايا وبتديني طاقة.
ماذا عن كواليس التعاون مع دينا الشربيني وآسر ياسين وردك إيه على حديث البعض بوجود خلافات بينهم؟
التجربة معهم مختلفة للغاية والجو العام كله رائع الكيميا بينهم حلوة جدًا ومفيش أي خلافات في العمل على الإطلاق.
هل سنشاهد في الأحداث تأثير منك على آسر للزواج من دينا؟
نعم.. أنا هحاول أوافق بين آسر ودينا، ولسه في أحداث حلوة ومفاجآت كتير جدًا جاية.
شايفة إنه بدري عليكي تجسيد دور الأم؟
خالص، دور الأم مش كبير عليا، مازحة: فاضل أطلع أم محمود حميدة بس، وأنا عندي والدين في سن نور إيهاب في الواقع وبقيت أم في الدراما من بدري، والدور حلو ولايق عليا.
هل غياب أسمائكم من على التتر كان به مضايقات أم اتفاق بينكما من البداية ؟
الأبطال اتفقوا من البداية إن مفيش تتر عشان محدش يزعل مين الأول ومين التاني كلنا اشتغلنا بحب ومفيش أي حساسيات.
في ناس بتفتكر إنك اعتزلتي بسبب فترات الغياب.. إيه ردك؟
أنا معتزلتش الفن خالص غيابي فترات بيخلي محدش يشوفني أو أجي على باله، لكن لما بيتعرض عليا شغل بقبله على طول، وعمري ما رفضت شغل من يوم ما ابتديت.
هل تشعرين أنك ليس مقدرة فنيًا وهل ذلك الأمر يأثر عليك ؟
مش بزعل إني مش واخدة حقي، ده رزق وقدر ونصيب.
شايفة إن الغياب بيأثر على علاقتك بالجمهور؟
طبيعي الجمهور لما بنغيب بينسونا، لكن الناس اللي بتقابلني فاكراني وبتسلم عليا بحب، وده أهم حاجة والحمد لله عندي شغل كويس وسمعة طيبة.
رأيك إيه في عمليات التجميل وهل ممكن تخضعي للتجربة؟
جمالي نعمة من ربنا، ولو احتجت أعمل تجميل ليه ما أعملش؟ مش لازم نبقى وحشين، والتكنولوجيا بقت حلوة جدًا، واللي محتاج يعمل تجميل يعمله.
في النهاية.. إيه طموحك الفترة الجاية؟
أتمنى أستمر في الشغل ومبطلش، وأكون دايمًا عند حسن ظن الناس، لأن ده أهم حاجة عندي.
