أمير الشناوي: مسلسل صحاب الأرض لكل الأجيال والأصعب أن يُولد صغيرٌ تحت القصف
حل أمير الشناوي مخرج الفيلم التسجيلي مفتاح العودة، الذي عُرض في نهاية مسلسل صحاب الأرض ضيفًا على احدى البرامج الإذاعية والذي كشف من خلاله عن كواليس تحضيره لهذا العمل.
أمير الشناوي: مسلسل صحاب الأرض لكل الأجيال والأصعب أن يُولد صغيرٌ تحت القصف
وقال: فخور جدًا إن الحلقة الـ 15 من مسلسل صحاب الأرض تبقى مختلفة وتكون فيلم تسجيلي بعنوان مفتاح العودة بما يوثق للأجيال الحالية والقادمة الكثير من التفاصيل المهمة، الفيلم كان تجربة مهمة جدًا بالنسبة لي، خصوصًا إنها أول مرة أشتغل إخراج مشترك مع أخويا كريم الشناوي، ودي كانت حاجة مميزة جدًا على المستوى الشخصي، كنا حاسين إن بعد 14 حلقة دراما قوية ومؤثرة، لازم يبقى فيه وقفة مع الحقيقة نفسها مع أرض الواقع.
وأضاف: المسلسل عمل شغل عظيم جدًا، وكل القائمين عليه تعبوا تعب رهيب، لكن وجود فيلم تسجيلي في الأخر كان إضافة مهمة، لأنه بيحط المشاهد قدام القصة الحقيقية من غير دراما، من غير تمثيل والناس اللي عاشت التجربة بنفسها، والفيلم بيسلط الضوء على قصة إنسانية جدًا، وهي قصة الأطفال المبتسرين الأطفال اللي اتولدوا قبل ميعادهم في بداية الحرب على غزة في نوفمبر 2023، فضلا على أن مستشفى الشفاء الطبي خرجت من الخدمة، وكان فيه 39 طفل لسه مولودين اتسابوا جوه المستشفى في ظروف صعبة جدًا، وعملية إخراجهم كانت معقدة لحد ما وصلوا مصر علشان يكملوا علاجهم
واستكمل قائلًا: كنا حاسين إن القصة دي لازم تتحكي بالكامل، خصوصًا من خلال أمهات الأطفال نفسهم، والمُسعفين اللي رافقوهم في الرحلة من غزة لمصر، وكمان طواقم الإسعاف المصرية اللي استقبلتهم عند معبر رفح، والدكاترة في مستشفى العريش والعاصمة الإدارية.. كل دول كانوا جزء من رحلة نجاة حقيقية
وأشار إلى أن أصعب إحساس بالنسبة لي كان وأنا بسمع قصص الأمهات تخيلوا أم تولد طفلها، وبعدها يحصل نزوح، وتنفصل عنه ويفضل هو جوه مستشفى تحت القصف الوجع ده صعب جدًا يتوصف، وإحنا بنصور، كان هدفنا نوثق الإحساس بصدق من غير مبالغة، من غير افتعال، فكرة الفيلم نفسه كانت منفصلة شوية عن أحداث المسلسل، لكن فيه بينهم تقاطعات.
