حسام عبد المنعم: أعيش بلا دخل والناس نسيتني.. والزمالك خذلني
كشف حسام عبد المنعم لاعب الزمالك السابق، تفاصيل الأزمة المالية التي يعاني منها خلال السنوات الماضية بعد ابتعاده عن الأضواء.
حسام عبد المنعم يكشف تفاصيل أزمتة المالية
قال حسام عبد المنعم في تصريحات إذاعية: أنا عندي زوجتين و5 أولاد، وعايش من غير دخل ولا مصدر رزق يُسترني ويُسترهم، رغم إني كنت لاعب دولي في الزمالك، لكني عاطل بلا أي عمل بعد ما كنت فى عز الشهرة والمجد.
وتابع: بعيش أصعب فترة في حياتي، وأبويا بعد ما كان بيفتخر بيا، بكى بالدموع وقالي: يا ريتك ما لعبت كرة، وقتها الكلمة كسرتني، لأنه شايفني بتسول الشغل والمصاريف.
وشدد: نادي الزمالك معملش معايا حاجة، والكل خذلني وماليش غير ربنا يفرك كربي ويجبر كسري، وبقوله دايمًا: هوّن عليا نظرة عيالي، أنا عايز أعملهم حاجة بس عاجز، لكن عندي يقين إن ربنا مش هيخذلني زي الناس ما خذلوني.
وواصل لاعب الزمالك السابق: قضيت أفضل سنين عمري في النادي وماليش صاحب ولا صديق غير ربنا، طول الوقت بكلمه وأعيط، مؤكدًا: محدش بيسأل عليا من اللي كنت بلعب معاهم، لكن بقيت بكلم ربنا عن أكل عيشي ورزقي.
وأوضح: أنا اللي اكتشفت مصطفى محمد وقدمته لنادي الزمالك، وكنت صاحب تاريخي في كأس مصر سنة 1998 أمام الإسماعيلي، لكن محدش افتكرني ولا قدر تاريخي مع النادي رغم إني أديته من عمري وصحتي.
واختتم حسام عبد المنعم تصريحاته: الشهرة والنجومية والفلوس راحوا والناس نسيتني، لكن ربنا مش هينساني وهو اللي فاضل معايا وواثق إن الخير جاي.
