أسامة نبيه: تجربة جون إدوارد مقنعة وهتنجح بس لازم هدوء نفسي ومادي
يرى أسامة نبيه، نجم الزمالك ومنتخب مصر الأسبق، أن تجربة جون إدوارد المدير الرياضي للزمالك مقنعة وسوف تحقق نجاحا كبيرا.
تصريحات أسامة نبيه
وقال أسامة نبيه، في تصريحات إذاعية: تجربة جون أدوارد مقنعة وهتنجح، وهنشوف النتيجة في النهاية، بس لحد دلوقتي مقنعة، بس لازم شوية هدوء نفسي ومادي، الفرقة مش هتقدر تكمل دا.
وأضاف أسامة نبيه: فخور أن معتمد جمال من جيلي، وسعيد بنجاحه، ماشي كويس وعامل نتائج مميزة وروتيشن، وأنا على تواصل معاه باستمرار.
وتابع نجم الزمالك السابق: صعب توقع بطل الدوري لصعوبة المنافسة، أتمنى طبعًا تتويج الزمالك بالبطولة، الزمالك يجيد اللعب تحت ضغط، ودايمًا بيتألق وقت الأزمات.
وأردف أسامة نبيه: السوشيال ميديا مش بتقول على حاجة حلوة، بيتكلموا بس في الوحش، وأنا معنديش عدوات مع حد، ومحدش مثلا أتكلم أني جبت ياسين عاطف مواليد 2007 بيلعب في الأهلي عشان عنده شخصية القائد، وكنت عايزه ينقل الروح دي للاعبين.
ويرى أسامة نبيه، أن تصريحه عن رغبته في الاحتفاظ ببعض اللاعبين للمشاركة في المباريات القادمة لمنتخب الشباب، مشددًا على أنه لم يرفع شعار المجاملات وقت وجوده مدربًا لمنتخب الشباب.
وقال أسامة نبيه: قولت أنا كنت محوش بعض اللاعيبة للمشاركة في المباريات الجاية، وكملت وقولت إن أشركت 18 لاعب بنسب متفاوتة، وهما اللي يقدروا يكملوا معايا في الدور الثاني، لأنهم لم يستهلكوا في الدور الأول، وقولت هديهم فرصة بالروتيشن في الدور الثاني، معرفش الناس فهمت الكلام غلط ليه.
وواصل نبيه: اللاعب كريم أحمد المحترف في ليفربول الإنجليزي مشاركش معايا لأنه جه تجمع واحد، وناديه قال هيبعته على تشيلي التي استضافت كأس العالم على طول، وكنت محتاج أشوفه بطريقة أفضل.
واختتم أسامة نبيه: في أندية رفضت تبعت لاعيبها لمنتخب الشباب في بطولة تجريبية، لأنها خارج الأجندة الدولية، وكانت فرصة مهمة لتجهيز بعض اللاعبين، واللاعب اللي مش بيلعب درجة أولى مع ناديه كان عنده صعوبة يشارك معايا مع منتخب الشباب، ووقتها قالوا أنا بجامل ناس لحساب ناس، وده محصلش، 95% من أندية مصر مكنوش بدأوا حتى فترة إعداد، كانوا في راحة وقت ما بدأت الاستعداد مع منتخب الشباب.
