أقوال الميكانيكي شاهد العيان على مصرع شخصين بخلاطة خرسانة بالتجمع: واحد وقع من على الخلاطة واتنين اتحشروا| تحقيقات
كشفت التحقيقات في واقعة مصرع شابين داخل خلاطة خرسانة بالتجمع الأول، تفاصيل الواقعة، حيث أدلى شاهد عيان يعمل ميكانيكيًا بشركة دار العالمية للتشييد والبناء بأقواله أمام جهات التحقيق، موضحًا أن الضحايا كانوا ينظفون الخلاطة من أعلى، ولكن لم يخبرا مشغّل المحطة أنهما سينظفان الخلاطة، وشغلها أحد الأشخاص دون علمه بأنهما داخلها.
أقوال الميكانيكي شاهد العيان على حادث وفاة شخصين في خلاطة الخرسانة بالتجمع الأول
ويستمر القاهرة 24، في نشر نص التحقيقات في واقعة مصرع شابين داخل خلاطة بالتجمع الأول، وجاءت أقوال شاهد العيان على الحادث ويعمل ميكانيكيًا بشركة دار العالمية كالآتي:
س: ما طبيعة عملك واختصاصك الوظيفي؟
ج: أعمل ميكانيكي موقع شركة دار العالمية للتشييد والبناء.
س: منذ متى وأنت تعمل بالشركة آنفة البيان؟
ج: من حوالي 10 سنوات تقريبا.
س: ما هي تفصيلات شهادتك؟
ج: اللي حصل إن أنا النهاردة 21-2-2026 الساعة 8:30 صباحا كنت في الموقع بتاع الشركة اللي في التجمع الأول، وكان موجود مشغّل المحطة في كابينة المحطة وكنت مع م ط وإحنا قاعدين في الكابينة لقيته راح داس على زرار التشغيل ولما داس عليه لقينا حد وقع من الخلاطة وكان فيه اثنين عمال اللي هما المتوفين إلى رحمة الله إبراهيم سعيد إبراهيم، ورمضان صبحي فاروق، كانوا بينظفوا الخلاطة من فوق، ولكن ماعرّفوش مشغل المحطة إنهم هيطلعوا ينظفوا الخلاطة، وهمّا لما طلعوا عشان ينظفوا، ماقفولش مفتاح الطوارئ اللي بيفصل الكهرباء بتاعة الخلاطة، والمفروض إنهم ماينفعش يطلعوا ينظفوا إلا لما يكون مشغّل المحطة هو اللي بيقولهم يطلعوا ينظفوا الخلاطة، والله يرحمهم طلعوا من غير ما يعرّفوه عشان كده هو كان فاكر إن الخلاطة مافيهاش حد وراح وشغّل الخلاطة، وداس على زرار التشغيل ولما شغل الخلاطة لقى فيه حد، وهو ده كل اللي أنا أعرفه وقع من على الخلاطة والثاني اتحشر جوه والاثنين توفيا إلى رحمة الله.
س: متى وأين حدث ذلك؟
ج: الكلام ده حصل النهاردة 21/ 2/ 2026 الساعة 8:30 صباحا موقع دار العالمية ببيت الوطن بالتجمع الأول.
س: وما السبب في وقوع ذلك الحادث تحديدا؟
ج: عشان الاثنين اللي بينظفوا مقفولش مفتاح الطوارئ اللي بيفصل الكهرباء بتاعة الخلاطة والمفروض إنهم مينفعش يطلعوا ينظفوا إلا لما يكون مشغل المحطة هو اللي بيقولهم يطلعوا ينظفوا الخلاطة.
س: وهل المتوفيان إلى رحمة الله إبراهيم سعيد إبراهيم ورمضان صبحى فاروق هما من دلفا لتنظيف المكسر دون علم مشغل المكسر؟
ج: أيوة هما طلعوا من غير ما يعرّفوه وده خطأ كبير لأنه ماينفعش يطلعوا ينظفوا من غير ما هو يعرف عشان هو اللي مشغل الخلاطة.
س: وهل من ثمة آلات مراقبة بالطريق محل الحادث؟
ج: معرفش.
س: وهل من ثمة شاهد أبصر وقوع الحادث تحديدا؟
ج: أيوة كان معايا واحد اسمه ع ص وده شغال مدير إداري بالمحطة.
س: وهل من صلة أو خلافات فيما بينك وبين المتوفيين إلى رحمة الله رمضان صبحي فاروق إبراهيم وإبراهيم سعيد إبراهيم؟
ج: لا لا مفيش خلافات ما بيني وبينهم.
س: وهل توجد شبهة جنائية بوفاة سالفي الذكر؟
ج: لا مفيهاش شبه جنائية عشان الله يرحمهم هما اللي طلعوا من غير ما يعرّفوا المشغل بتاع الخلاطة.
س: هل من صلة أو خلافات فيما بينك وبين المتسبب / محمد طه علي محمد؟
ج: لا مفيش صلة ولا خلافات ما بينا.
