ضربه بخنجر عشان طلع عليّا إشاعات.. ننشر أقوال الطالبة في واقعة مقتل محمد هاني طالب الأكاديمية العربية | خاص
أحالت جهات التحقيقات المختصة بالقاهرة، المتهم بإنهاء حياة الشاب محمد هاني طالب الأكاديمية العربية ومعاونه إلى المحاكمة الجنائية المختصة.
تحقيقات في واقعة مقتل محمد هاني طالب الأكاديمية العربية
وينفرد القاهرة 24 بنشر تفاصيل التحقيقات في قضية مقتل الشاب محمد هاني طالب الأكاديمية العربية، وحصل على أقوال ه. م الطالبة.
وقالت الطالبة أمام جهات التحقيق في واقعة مقتل طالب الأكاديمية محمد هاني: محمد هاني محمد وأحمد حطب كانوا زمايلي في الأكاديمية البحرية، وأنا بدرس في الأكاديمية البحرية قسم هندسة، واتعرفت على المتهم أحمد حطب لأنه كان بيقعد جنبي في المحاضرات وكلامنا بدأ في حدود الدراسة وبعد كده بقينا أصحاب لفترة صغيرة حوالي أسبوع، لكن بعد كده لقيته بيكلمني في كلام خارج فقررت أقطع علاقتي بيه.
وأضافت الطالبة أمام جهات التحقيق في واقعة مقتل طالب الأكاديمية محمد هاني: بعدها بحوالي شهر وأنا في الأكاديمية، كنت مع واحدة صاحبتي في بيزنس مع محمد هاني، وفعلًا اتعرفنا واتكلمنا فترة، وبعدها قالي إنه معجب بيا واتفقنا على الارتباط، وكانت الأمور ماشية كويس.
وتابعت الطالبة في واقعة مقتل طالب الأكاديمية محمد هاني على يد زميله: بعد كده في شهر 10 سنة 2025 بدأت تطلع إشاعات عليا في الجامعة إن أحمد حطب قال إنه كان على علاقة بيا، والكلام ده انتشر جدًا، فكنت متوترة واضطريت أحكي لـ محمد هاني، وهو قالي تمام وعدى الموضوع، وبعد كام يوم قالي إنه كلم أحمد حطب وشدوا مع بعض في الكلام، وبعدها الموضوع خلص ومبقاش في سيرة بينهم.
وتابعت الطالبة: العلاقة بيني وبين محمد هاني فضلت كويسة لحد فترة قريبة، وبدأت تحصل مشاكل بسبب إنه كان رافض خروجي مع زمايلي الولاد في الأكاديمية، لحد ما حصلت قطيعة بينا من حوالي أسبوع، وبقينا مش بنتكلم زي الأول.
واستكملت الطالبة: النهاردة وأنا خارجة من الجامعة مع واحد صاحبي اسمه إياد، محمد هاني شافنا وهو راكب موتوسيكل مع واحد صاحبه، وجري ورانا وقطع علينا الطريق، وكان عايز يتخانق مع إياد، لكن إياد مرضاش علشان أنا كنت معاه، والخناقة كانت كلام بس وانتهت وكل واحد مشي.
وأوضحت الطالبة أمام جهات التحقيق: في آخر اليوم سمعت من زمايلنا في الأكاديمية إن محمد هاني اتقابل مع أحمد حطب وحصلت بينهم خناقة، وإن أحمد حطب ضربه بخنجر وتوفى، لكن أنا معرفش اتقابلوا إزاي، واللي عرفته كمان إن اللي كانوا موجودين وقتها محمد هاني ومعاه صاحبه يوسف، وأحمد حطب ومعاه واحد صاحبه اسمه ياسين، بس أنا معرفش باقي بياناتهم.
