سيدة تشكو من سائق نقل ذكي: تعدى عليّ لفظيًا ومشي من منطقة مقطوعة
نشرت سيدة منشورًا لها، عبر حسابها بموقع التواصل الاجتماعي، تشكو فيه من سائق يعمل بشركة نقل ذكي، ضايقها وتعدى عليها لفظيًا.
وقالت مونيكا ميلاد، في منشور لها عبر حسابها بموقع التواصل الاجتماعي فيسبوك، بنتي تعبانة والنهاردة لغيت الشغل علشانها، وطلبت عربية من شركة نقل ذكي، علشان أروح بيها ومعايا شنط وحاجتي وبنتي، وجالي السائق، وأول ما ركبت كان بيبص عليا وأنا شايله البنت في الشيالة، وكل شوية يقلب رقبته الناحية التانيه ويضحك، وأنا كنت ببتسم فكراه بيضحك علشان البنت، بعدها لما كرر الابتسمات دي قلبت وشي الناحية التانية.
وأضافت مونيكا ميلاد، سيدة تشكو من تعرضها لمضايقات وتعدي لفظي من سائق بشكرة نقل ذكي: السائق فضل ياخد بينا مطبات كتير والبنت هتطير من على رجلي وأنا بقوله بالراحة، والبنت لولا الشيال كانت اتخبطت مني يضحك ويبصلي في المرايا، وبعدين أخدني أنا والبنت وطلع بينا على الدائري وفجاءة العربية عطلت.
واستكملت: قالي اطلبي عربية تاني علشان عربيتي فيها مشكلة قولتله إزاي كده !!.. أنت شايف معايا طفلة وشنط قالي أعمل إيه فصلت بنزين، والبنت ابتديت تصرخ وتعيط وأنا بحاول أحايل فيها وبطلب عربيات مش لاقية في المنطقة المقطوعة دي، وابتديت أتوتر فين وفين لما حد وافق وبعدين كنسل وبعدين حد تاني وافق بعد أكتر من نص ساعة وصلت عربية.
وأضافت مونيكا ميلاد، ابتدى السواق اللي كنت معاه يتخانق معايا على الأجرة، قولتله أجرة ايه بعد اللي إنت عيشتني فيه قالي ده حقي وحسيت إنه هيبلطج روحت بسرعة طلعت الفلوس واديتهاله، وقولت للعربية اللي أنا ركباها تتحرك، والعربية بتتحرك بيا الراجل ده شتمني بأقذر الألفاظ، وقعد يعطل الراجل اللي ركبت معاه علشان ينزلني أنا وبنتي الرضيعة عمرها 7 شهور، وبيقولوا دول عالم مجانين نزلهم، مش قادرة أفهم كان عايز يوصل إيه للسواق علشان ينزلني أنا وبنتي واعترض طريق العربية، فين وفين لما عرفت أهرب منه، تم الاعتداء اللفظي عليا بأقذر الألفاظ وأنا أصلا معملتش حاجة، وكمان اديته المبلغ اللي طلبه مني بالظبط خوفا منه، قلبي محروق حرقة محدش يتخيلها ولطمت وصوت لما روّحت وقعدت أرجع من كتر الخوف وعلى الألفاظ اللي عمري ما سمعتها في حياتي والقذر ده بعد 30 سنة من عمري سمعهالي.
