فيها حاجة حلوة| محمد مجدي شاب مسلم: نفسي أسمع لحن "غولغوثا " في الكنيسة.. طقس يجمع بين قدسية الإيمان وعظمة تاريخنا المصري
تداول مستخدمو السوشيال ميديا منشورًا لشاب كان يريد حضور يوم الجمعة العظيمة بإحدى الكنائس بسبب حبه الشديد للغة المصرية القديمة، وهو ما دفع عدد من حاضري القداس يوم الجمعة العظيمة لتصوير مقاطع فيديو وإرسالها له، وتواصلهم معه فيديو كول خلال الصلاة.
في البداية شارك الشاب ويدعى محمد مجدي منشورًا عبر صفحته على موقع فيسبوك عن تمنيه حضور الجمعة العظيمة قال فيه:
النهاردة الجمعة العظيمة جمعة مباركة ومقدسة أرجو ليكم فيها صلاة مقبولة وأيام مليانة بركة وسلام، وبقالي سنين نفسي أحضر صلاة الجمعة العظيمة في الكنيسة ورغم إني عارف إن شباب الكشافة اللي بيشوفوا البطايق بيبقوا شديدين شوية في التنظيم بس معذورين طبعا بسبب اللي شفناه زمان بس حقيقي لسه الحلم ده جوايا.
وأضاف: مش قادر أتخيل إحساسي هيكون إيه لو سمعت لحن جولجوثا لايف في ختام الصلاة وإني أسمع بودني أقدم لحن في العالم بيتعزف قدامي!
ومش قادر أستوعب اني ممكن اسمع ترتيل على نفس اللحن اللي اتعزف في الجنازة الملكية والوداع لملوك مصر العظام زي خوفو، ورمسيس التاني وتحتمس التالت وبيتعزف كمان بنفس الآلات الموسيقية المصرية القديمة زي المثلث والناقوس وبيهز المكان بعد الاف السنين!
وتابع مش مصدق اني ممكن احس بصدى وعظمة اجدادي وحاسس ان الرهبة هاتملى قلبي وقتها والموقف بالنسبالي هايكون مُهيب وجسمي
وبعد أيام قليلة من يوم الجمعة العظيمة، شارك الشاب منشورا آخر جاء فيه:
أنا كنت كتبت بوست بسيط يوم الجمعة العظيمة وقولت فيه إني بتمنى أسمع لحن معين بيتعزف في اليوم ده، واتفاجئت بكمية محبة غير طبيعية حوالي 3000 تعليق كلهم دعوات ليا ولوالدتي بالسعادة والصحة والجميل.
وتابع: بعد آلاف التعليقات جالي مئات الرسايل الخاصة كلام كله رقي ومحبة من ناس برضو لأ، والساعة 6 أو 7 بليل جالي عشرات الرسايل فجأة بفتحها لقيت تسجيلات صوتية وفيديوهات (زي اللي في الصور دي).
وتابع: الناس وهي في قمة خشوعها في الكنيسة وفي ختام الصلاة لما اللحن اشتغل افتكروني وجيت على بالهم وسجلوا وبعتوا عشان أسمع وأشوف معاهم!
حتى فيه ناس كلمتني فيديو كول لايف عشان أكون حاضر المشهد بالصوت والصورة!
ولاقى منشور تفاعلا واسعا عبر منصات التواصل الاجتماعي وتصدر التريند خلال الأيام القليلة الماضية.
