مراته معطلة الدنيا.. طليقة مسلم تشكو من عدم إنفاقه على نجلهما: رماني وأنا حامل وعليا ديون
كشفت ضحى، طليقة مطرب المهرجانات الشعبية مسلم، تفاصيل الخلاف بينهما بسبب عدم إنفاقه على نجلهما، موضحة أنها حاولت الوصول إلى حل دون اللجوء إلى القضاء ولكن جميع المحاولات باءت بالفشل إلى أن رفعت قضية نفقة لطفلها.
وقالت طليقة مسلم، في لايف عبر حسابها بـ إنستجرام: قعدت سنتين أتحايل أن ابني يتصرف عليه، وكل حاجة معايا ليها إثبات، كنت بتحايل عليه يشوف ابنه ومفيش، رفعت قضية ووالدي اللي بيصرف عليا بسبب تأخير النفقة، والفلوس مش بتدفع شهر بشهره ولازم تنفيذ المحكمة يا إما يتهرب يا ينقل من مكان لمكان، كل 5 شهور باخد فلوس ويطلع عيني بمحايلات.
وتابعت: أنا عزلت 3 مرات بسبب أني مش عارفة أعيش في مكان كويس، مش عارفة أدخل ابني المدرسة ولا أجبله حاجة، أنا عليا ديون بفلوس كبيرة، أنت بتتهرب من ابنك ليه؟، هو أنا هبوس إيدك عشان تصرف على ابنك؟.
ووجهت طليقة مسلم، رسالة لزوجته الحالية، قائلة: في حد بيساعده علشان ميصرفش على ابنه، والفلوس اتعطلت من مراته، أنا ست زيي زيك المفروض تحسي بيا أني معايا طفل وأنتي بطولك، وأنتي كذا مرة تدخلي تستفزيني وبعدي الدنيا، ولكن عند رزق ابني كمان وبتعطلي الدنيا؟، حسبي الله ونعم الوكيل أنا مش مسامحة.
وأضافت: كان هناك محاولات من مسلم لجلعها تتنازل عن قضية النفقة لكي يستطيع السفر خارج البلاد، قائلة: كنا هنمشيها ودي عند المحامي وطلب مني أتنازل خالص عن القضية وهو يسافر، أنا أعمل معاه إيه؟، وقالي قبل كده ابقي جيبيني بقى ودوري عليا، أنا عملتلك إيه؟، رمتني وأنا حامل وولدت وربيت لوحدي وسكتنا، أتنازل بعد ده كله؟.
