وليد صلاح الدين يعتذر لـ جماهير الأهلي عقب الفوز على الزمالك
اعتذر وليد صلاح الدين، مدير الكرة بالنادي الأهلي، للجماهير على الإخفاق في الفترة الماضية، وذلك في تصريحات عقب الفوز على الزمالك بثلاثية دون رد، لحساب الجولة الخامسة من المرحلة النهائية بمسابقة الدوري المصري الممتاز.
وليد صلاح الدين يعتذر لـ جماهير الأهلي عقب الفوز على الزمالك
وقال وليد صلاح الدين في تصريحات تليفزيونية: عايز أقدم اعتذار واجب لـ كل جماهير النادي الأهلي وكل من ينتمي للنادي الأهلي على الإخفاق في الفترة الماضية، لم نحقق طموحات الجماهير، ولكن هذا يحدث في كل العالم، وأعلم أن سقف الطموحات زاد بعد استقدام أفضل اللاعبين في إفريقيا، وكان نفسنا نقدم أفضل من بطولة السوبر ولكن عزائي الوحيد إن الأهلي بيرجع أقوى بسرعة وأقوى من الأول زي كبار الأندية في العالم، والمسؤولين في النادي بيعرفوا ازاي يرجّعوا النادي الأهلي.
وأضاف: بقول بس للمنتمين للنادي الأهلي، بلاش تجريح في الرموز، أنا عارف إن الوقت مر والطموحات كانت إننا نكسب كل البطولات، وتوروب مش بيلحق يمرّن اللاعبين بسبب انضمامهم للمنتخبات ولكنها مش شماعة، وأنا بعتذر نيابة عن كل المتواجدين للجماهير، وبقولهم الأهلي راجع راجع، ويارب النهاردة يكون عربون صلح صغير.
وأشار وليد صلاح الدين في تصريحاته: مش هندي اللاعبين راحة، ومباراة إنبي مهمة، ونختم بمباراة المصري، وهنعمل اللي علينا وإن شاء الله ربنا يكون شايلنا الخير كله، التوفيق كان غايب عننا طول الموسم، وسبحان الله جه النهاردة، باستثناء مباراة طلائع الجيش التي كنا نستحق أنه نُهزَم فيها لم تكن هناك أي مباراة أخرى نستحق فيها الهزيمة، ولكن التوفيق كان غائب وأكيد هناك أسباب لذلك.
وأفاد: جالنا إحساس إن ربنا مش رايد، كل ما نلاعب فريق تبقا الأرقام كلها في صالحنا لكن مفيش توفيق، في مباراة المصري ضيعنا ضربة جزاء في الآخر، وفي مباراة بتروجت، وفي مباراة زد كمان، ولكن الحمدلله على كل شيء، وبقول لـ اللاعبين النهاردة قدمتم عربون صلح، وعارفين إن إمكانياتكم أعلى من كدة بكتير ولكن الثقة غايبة، ولو فيه ثقة نكسب النهاردة بنتيجة كبيرة.
وأتم وليد صلاح الدين تصريحاته: فيه أخطاء مينفعش تتصلح إلا بنهاية الموسم، واعترفنا بـ دا، والخطأ محتاج حلول جذرية، وكلنا لازم نعاني، وبنعتذر تاني وإن شاء الله الأهلي هيرجع أقوى، ولازم ندي كل واحد وقته وفرصته عشان يعرف يشتغل، ولكن الأهلي بإذن الله راجع بس الأهم نبدأ على خير من الموسم الجديد بعد ما ننهي الموسم دا بكل الوحش اللي فيه.
