بـ15 ألف جنيه.. صاحب واقعة المنع من دخول فيلم أسد بسبب الزي الصعيدي: لو عار مش هنلبسها تاني| خاص
تداول مستخدمو مواقع التواصل الاجتماعي مقطع فيديو لـ شاب صعيدي، يشكو من إدرة فندق شهير بوسط البلد، بعد منعه من دخول السينما الموجودة داخل الفندق رفقة أصدقائه، لمشاهدة فيلم أسد لـ محمد رمضان، بسبب ارتدائهما الجلابية الصعيدي.
وقال محمد المطعني، الشاب الصعيدي الذي تم منعه من دخول السينما ببسب ارتدائه الجلابية الصعيدي، في تصريحات خاصة لـ القاهرة 24، أنا من الأقصر وعندي شركة تسويق عقاري في القاهرة، واتفقت مع جماعة صحابي نروح نشوف فيلم أسد للفنان محمد رمضان، واللي طلب إننا روح هو عم خريبش، وقولنا نفرحه وناخده السينما نفرجه على الفيلم.
الشاب الصعيدي صاحب واقعة المنع من دخول السينما بسبب الزي الصعيدي: لو عار مش هنلبسها تاني
وأضاف: بحثنا عن أقرب السينمات لينا، ولقينا سينما مسرح الزعيم مقفولة، واللي متاحة سينما هيلتون جراند نايل، وفعلًا روحنا المكان، ولما وصلنا سألت على الباب السينما منين، الأمن قالي من الباب الثاني، روحنا هناك والأمن رجعنا عند الباب الأول تاني، وسألت الأمن بقوله ليه قلت لنا نروح من الباب التاني وأنت عارف إن السينما من هنا، قالي أنا اتلخبطت وقام عمل مكالمة تليفون للإدارة.
واستكمل الشاب الصعيدي: الأمن قال على أوصافنا لإدارة الفندق إننا 3 لابسين جلابية صعيدي، ودا ضايقنا جدًا لأننا نعتز بالجلابية الصعيدي، وبنعتبرها جزء من الهوية المصرية، ومش حابين نغيرها، وبالفعل رفضوا إننا ندخل السينما بـ الجلابية الصعيدي، كنت بسمع كتير عن منع الصعايدة من دخول بعض الأماكن العامة بـ الجلابية الصعيدي، ولكن عمري ما تخيلت إني أكون في الموقف دا.
واختتم: معانا بدل كتير ولبس كتير زي باقي الناس، ولكن إحنا صعايدة وبنعتز بالجلابية الصعيدي، والزي الصعيدي تكلفته غالية جدًا وسعر أقل جلابية لا يقل عن 5 آلاف جنيه، وفي أنواع قماش سعره يتخطى الـ 15 ألف جنيه ومش أي ترزي يعرف يفصلها، محتاجين حد مسئول يوضح لنا لو الجلابية الصعيدي عار مش هنلبسها تاني.
