أحمد عز: النجاح مش مادي فقط.. وعمري ما قلت إني أعلى إيرادات في تاريخ السينما
تحدث الفنان أحمد عز، عن جدل الأعلى مشاهدة وأجرا، موضحًا أن مقياس النجاح الأول بالنسبة له هو أن يعيش العمل لدى الجمهور على مدار سنوات، مؤكدًا أن النجاح ليس ماديا فقط.
وقال أحمد عز، في مؤتمر عرض فيلم the seven dogs: النجاح مش مادي فقط، بالعكس النجاح هو إن فيلمك يعيش وتقدر تشوفه بعد 10 و20 سنة، ده مقياس النجاح بالنسبة ليا، واللي بيخلي عمرك أطول أنك تعمل أفلام كبيرة أنك تحقق الحد الأدني من اللي الراجل دفعه.
وتابع أحمد عز: مش معنى إني جبت أعلى إيراد إني أبقى أحسن واحد، أنا مش أحسن واحد، ولكني أوعدك إني هبقى أكتر بني آدم مجتهد في الدنيا، أنا ممكن أدفع من جيبي في فيلم علشان أعمل حاجة كويسة، ميهمنيش اللي هيدخل جيبي على قد ما مهتم أعمل حاجة تقعد طول العمر وأبقى امتداد لأساتذة كبار التاريخ لسه حافظهم لحد دلوقتي أنا عايز أبقى وسط الناس دي.
واختتم: عمري ما كلمت حد قولتله أكتب عني أني أعلى إيرادات، أنا مش محتاج أثبت حاجة، اللي محتاج أني أعمله أني أعمل أفلام ترضي أكبر عدد ممكن من الناس اللي بتتفرج، والإيرادات دي رزق من عند ربنا.
