حلمي عبد الباقي ردًا على الموسيقيين: تهمتي شرف ومش محتاج أخد موافقة المجلس على قرار علاج بـ 100 جنيه
رد الفنان حلمي عبد الباقي على بيان نقابة المهن الموسيقية، برئاسة الفنان مصطفى كامل، بعدم التزامه بنسب التحمل المقررة في مشروع العلاج بالنقابة، موضحًا أن جميع الاتهامات التي وجهتها له النقابة هي اتهامات مشرفة حيث أنها تتمحور حول مساعدة الأعضاء في علاجهم.
وقال حلمي عبد الباقي، في فيديو عبر حسابه بـ فيس بوك: لما موظفة غلبانة بتقبض 2000 جنيه، تيجي تطلب مني كشف بـ 200 جنيه، ولا حد عايز تحاليل بـ 250 جنيه، دول اللي هيهدوا المركز المالي للنقابة؟ بس إحنا عندنا فلوس ودايمًا بتقولوا فلوس الموسيقيين للموسيقيين، آه دول موظفين بس إيه المشكلة؟، أكيد مش محتاج أخد موافقة المجلس على قرار بـ 100 جنيه، دي تهمة غريبة.
وأضاف حلمي عبد الباقي: تهمتي تهمة شرف، لم أتهم بسرقة ولا رشوة ولا أي حاجة مخلفة بالشرف، أنا برفع رقبتي قدام الناس وولادي وعائلتي، أني لم أُتهم بأي حاجة مخلة بالشرف، الحمد لله لغاية آخر لحظة في حياتي، تهمة شرف أني ساعدت في علاج إخواتنا الأعضاء الغير قادرين، وأقسم بالله أني عمري ما عملت جواب إعفاء لـ حد إلا لما قلت لـ النقيب وأنسب الفضل ليه قبلي، أنا بتعامل مع ربنا، والحمد لله أنا راضي بنفسي وواثق في ربنا.
ووجه حلمي عبد الباقي، تساؤولًا للفنان مصطفى كامل، نقيب المهن الموسيقية، قائلًا: أنت من 2015 لغاية ما بقيت النقيب كانت أوردراتك قد إيه؟ وبعد ما بقيت النقيب أوردراتك بقت قد إيه؟، سؤال مشروع وأعضاء الجمعية العمومية عايزين يعرفوا.. إلى جانب كلامي على الساحل الشمالي.
