تامر حسني عن حفله الأخير بالأرينا: الأحلى في حياتي.. نقلة نوعية طورت بها الصناعة
تحدث الفنان تامر حسني، عن حفله الأخير بالأرينا، والذي أٌقيم ضمن حفلات عيد الأضحى 2026، موضحًا أنه الأحلى في مسيرته الفنية بسبب ما قدمه من عروض وإعادة تقديم لأغانيه القديمة، مؤكدًا أن الحفل نقلة نوعية.
وكتب تامر حسني، عبر حسابه في انستجرام: حفلة الأرينا بجد أحلى حفلة في حياتي، ومبسوط إنكم اتبسطوا بيها أوي كده وعملت كل اللي كنتوا بتقولولي عليه غنيت أغاني مش بغنيها وقدمت توزيعات جديدة ولعبت ريمكسات جديدة متسجلة عشان خاطركم من جديد زي ما طلبتوا مع الـ Dj هانز، والموزع الكبير جلال فهمي والفنان الراقي سام محمد.
وتابع تامر حسني: سهرنا شهر كامل نسجل ونوزع من جديد كإني بعمل ألبوم ورجعت عملت عروض كاملة زي 2007، بس طبعًا بتطور مش طبيعي في المسرح المصري والعربي زي مانتوا شايفين أكيد ده مش شكل مسرح طبيعي، المسرح ده فكرتي وعملته عشان أطور بيه الصناعة مرة تانية من بعد ما أدخلت زمان الفاير وركس بشكل ضخم في كل أنحاء مصر والوطن العربي مع العبقري أحمد عصام، وكمان الشاشات العملاقة المتنوعة والـ 3D mapping، وطبعًا اشتراك المطرب نفسه في العروض مع الاستعراضيين بنفس كفاءتهم.
وأضاف تامر حسني: النهاردة قدمت ديكور مسرحي بتكلفة يمكن تجاوزت 3 أضعاف تكلفة المسرح الطبيعي المعتاد علشان أقدمهلكم ويكون نقلة نوعية جديدة بقدمها للمرة التانية في سنة 2026 على هيئة ديكور ضخم ومتنوع، كل المجهود والتعب اللي عدى في الشهر اللي فات عشانكم نسيته وتحول لفرحة مع أول سقفة منكم ليا.
