مدرب الاتحاد: "الحكام ليسوا سبب خسارة الفريق دوري السلة أمام الزمالك"
تحدث أحمد مرعي، المدير الفني لنادي الاتحاد السكندري لكرة السلة، عن خسارة بطولة درع الدوري أمام نادي الزمالك.
وقال مرعي في تصريحات تليفزيونية: "سعيد بالظهور المشرف للفريق بالشكل ده رغم الخسارة، أنا شخصيًا سعيد بالمستوى المتقارب والمجهود اللي عمله لاعبو الزمالك والاتحاد طوال سلسلة النهائي".
وأضاف: "أسباب الخسارة؟ فيه جزء مع المجهود اسمه التوفيق، والتركيز كان من نصيب لاعبي الزمالك في التصويبات في الأوقات الحساسة عكس فريقنا".
وواصل: "حصلنا على فرص كتير ومقدرناش نسجلها، اللي أهدر التصويبات لاعبين كبار".
وتابع مرعي: "لا أعترف بكلمة لاعبين دكة في لعبة كرة السلة، انك توصل كل اللعيبة إنهم جاهزين ده أهم حاجة، بتحتاج قرارات من بعض اللاعبين النجوم في أوقات معينة من المباريات هي إلى تحسم المباراة".
وأردف: "ما زلت مصر على تصريحي بأن السيطرة على هودج ساهم في فوز الاتحاد في المباراتين، لما أقول إنه القلب النابض للزمالك ده كلام عارفه كل اللي بيفهمه لاعبي السلة، صانع ألعاب المبدع بيمثل جزء مهم في أي فرقة على مستوى العالم".
واستكمل مرعي تصريحاته: "طلبت عدم وضع مايكات بجانب دكة الاتحاد بالفعل، أنا انفعالي جدًا وأوقات في الوقت المستقطع بكون منفعل جدًا وبعد المباراة بشوف إن ميصحش المستمعين وأهالي اللاعبين يشوفوا التأنيب للاعبين، الحاجة الثانية إن فيه أوقات بتكلم في فنيات مع اللاعبين وبطالبهم بشيء بشوف مدرب الزمالك بلاقيه مستعد للي بقوله فهل ده مجرد صدفة؟ أنا معرفش، فقولت لا مفيش داعي للموضوع ده".
واختتم مرعي: "في المباراة الثالثة والثانية كان في بعض القرارات التحكيمية المصورة بكاميرات الجهاز الفني في حالات تقلب المباريات، ونكسب ودي حقائق مسجلة، ولكن الحكام مش بيكونوا قاصدين يخسروا فريق معين".
أحمد مرعي: وزارة الرياضة وافقت على تجنيس لاعب وضمه لمنتخب الفراعنة للسلة
