حكيم عن أزمة مطربي المهرجانات: ناخدهم ونعلمهم زي ما كان بيحصل معانا زمان | فيديو
كشف الفنان حكيم رأيه في فن المهرجانات الشعبية، وانتشاره بكثرة السنوات الماضية، فضلًا عن إثارته للجدل طوال الوقت، وصدور قرارات من الموسيقيين بشكل مستمر بإيقاف مطربي هذا اللون من الغناء.
وتابع حكيم خلال مداخلة هاتفية، مع الإعلامي عمرو أديب ببرنامج الحكاية، المذاع على شاشة إم بي سي، قائلًا: موضوع شائك بالنسبة لي وحساس، أنا شايف النقابة والرقابة على المصنفات الفنية، قايمين بدورهم بصراحة، ده من منطلق الحفاظ على الذوق العام، وفي نفس الوقت هارجع أقول إن الشباب دول ناجحين وبقى ليهم جمهور، ونسب مشاهدة منقدرش ننكرها، ولون جديد منقدرش نهاجمه.
وأضاف حكيم: بس النقابة بتؤدي دورها، والممنوع مرغوب، وكل ما نمنعهم الشباب بتروحلهم أكتر، لأنك بتتكلم عن جيل العولمة منقدرش نقول بنحارب جيل، لأن بنعاني بجيل، أنا شايف إن النقابة والرقابة على المصنفات، يقوموا الشباب دول مش يمنعوهم، هما ناجحين، ناخدهم ونعلمهم إزاي يختاروا الألفاظ بتاعت أغانيهم، زي ما كان بيحصل معانا زمان.
وأشار حكيم: الرقيب على المصنفات كان رقيبا علينا وليه دخل بصورتي، لحد ما بقينا رقباء على أنفسنا، ماقدرش نقول نمنعهم إحنا في زمن اليوتيوب والأبلكيشنز خلى الولاد دول متوغلين، أنا كل يوم باصحى على خناقة ومين اتخانق مع مين ومين اتوقف، لو سبناهم ممكن نشوف مين فن هابط وممكن ينتهي ولا مينتهيش، المفروض ناخد الحلو ونراقبه ونعلمه.
إيقاف مطربي المهرجانات
وفي وقت سابق، أصدرت نقابة المهن الموسيقية، بيانًا أعلنت من خلاله إيقاف عدد كبير من مطربي المهرجانات، وأبرزهم: حسن شاكوش، حمو بيكا، حمو طيخة، الزعيم، عنبة، مجدي شطة، وغيرهم.
