كنت جثة هامدة.. إيمان الحصري تكشف أصعب يوم في رحلة مرضها
تحدثت الإعلامية إيمان الحصري عن أصعب يوم في فترة مرضها التي استمرت نحو 7 أشهر، وذلك خلال لقائها مع الإعلامية والفنانة إسعاد يونس في برنامجها صاحبة السعادة.
وقالت إيمان الحصري: أصعب يوم لما نقلوني من مستشفى وادي النيل، وأخذت بنج كتير وكل اللي كان بيجي في ذاكرتي الألم، واتنقلت بالإسعاف من عناية لعناية.
وتابعت: من أصعب التجارب اللي مريت بها، طول الوقت كنت بسمع عن ناس بتتألم والمرض حاجة صعبة لكن دلوقتي شعرت وفهمت نفسيا وجسديا الناس دي فيها إيه وعايشة إيه.
واستكملت: شكلي على السرير وفي العناية كان صعب والناس فاكرة أني مش حاسة بهم ومش موجودة، لكن كنت بسمع كلمة حالتها صعبة، لأني من كتر التعب كنت جثة هامدة بس الحواس شغالة والناس بتتكلم عليكي على أنك مش موجودة وكل اللي حواليا بياخدوا قرارات بالنيابة عني وقرارات تخصني.
وأردفت الحصري: في اليوم ده شفت في عينهم أن كل حاجة بايظة مفيش بني آدم كل شيء مش موجود والمؤشرات الحيوية اللي بتقول هو يكمل الحياة ولا لا مش موجودة، اتعمل لي نقل دم وبلازما عشان يحاولوا يخلوني عايشة لكن مش بتضمن لي هيعش اد إيه.
وأضافت: نقلت دم من الأسرة كلها قعدت في العناية 20 يوم وبعدها نقلوني عشان حالتي النفسية، لأن العيشة في غرفة كلها صوت الأجهزة وريحة المستشفى.
وأضافت: خلال الفترة دي أخدوا قرار أن مفيش عمليات تاني ولو ربنا كتب لي عمر ما ينفعش عمليات تاني والدكاترة قالوا سيبوها في حالها ممكن تشوفوا حاجة تانية مختلفة غير العمليات.
وأكملت: من أكتر الحاجات الصعبة أنك مش حرة، وأنك تفضلي موجودة في الحياة مرتبط بالأجهزة بتحرك بأجهزة كتير جدا لما طلعت من غرفة العناية كان مصدر للسعادة بالنسبة لي لأني.
وواصلت: ما كنتش بقدر اتحرك لوحدي، حتى الحركة على السرير كانت بمساعدة، وكان صعب جدًا بالنسبة لي لأني كنت بعمل كل حاجة لنفسي ومعتمدة على نفسي، وكنت باكل عن طريق الأنابيب الحاجات دي الناس بتعملها وفاكر أنها طبيعية.
