هشام المليجي: أنا عملت كل حاجة في الفن.. وقررت الابتعاد علشان عاوز أكون فيلسوف
تحدث الفنان هشام المليجي، عن هوياته الشخصية، موضحًا أنه قدم كل شيء متعلق بالفن، كما كشف حقيقة خلافه مع الفنان محمد سعد بسبب فيلم بوحة، والذي شارك فيه عام 2005، وحقق نجاحًا كبيرًا وقت عرضه.
وقال هشام المليجي، في تصريحات تليفزيونية، عن خلافه مع محمد سعد بسبب حذف مشاهده في فيلم بوحة: متخانقتش مع محمد سعد، ولا عندي خناقة مع أي زميل من الزملاء، فيلم بوحة كنت أنا ومي عز الدين وأستاذة لبلبة، كنا مضايقين ساعتها في الفيلم، لأن محمد سعد كان عليه أنه يخوض تجارب جديدة ويغلط ويصحح، ويقع ويقوم عشان الحياة تستمر ويتعلم من تجاربه، وأنا كذلك وكلنا كذلك، وأنا مش زعلان من ولا واحد فيهم وكلهم حبايبي.
وأردف الفنان هشام المليجي حديثه بأنه هو من اختار الابتعاد عن الوسط الفني، موضحًا أنه يتمنى أن يكون فيلسوفًا: أنا اللي مبتعد عنهم مش هما اللي مبتعدين عني، لأن أنا قاعد في البيت وعندي اهتمامات تانية، أنا كتبت ومثلت ولحنت ورسمت، لكن أنا ولا حاجة من دول، أنا عايز أطلع فيلسوف، اللي نجح في الدنيا اللي عرف يسيطر على نفسه، طول ما بنعذر الناس وبنغفر وبمنغلطش في حد خلاص، أي حاجة بيعملها البشر في نظري صغائر، الموضوع يتلخص في قول ربنا قد أفلح من زكاها.
كما أعرب الفنان هشام المليجي، عن حبه الشديد للموسيقى، موضحًا أنه عضو في نقابة المهن الموسيقية: أنا مؤلف موسيقي بألف مزيكا من أيام ما كنت في المعهد، وأنا عضو نقابة كـ ملحن سنة 1995، أيام ما كان حسن أبو السعود النقيب، وأنا عامل في نقابة المهن التمثيلية، والنقابة مبتديش معاشات يا جماعة، عشان محدش يقول إنه عضو في نقابتين وبياخد معاش، لأ وفي أخطاء كتير شائعة.
