إيمي سلطان: المفروض نقدم الرقص الشرقي في مؤسسات ثقافية زي المتاحف والمسارح
عبرت الراقصة الاستعراضية إيمي سلطان عن رأيها في مستقبل الرقص الشرقي في مصر، متمنية ألا يدوم الحال ويقتصر على تقديمه في الملاهي الليلية وأماكن السهر فقط.
وقالت إيمي سلطان خلال حوارها مع القاهرة 24: أكيد مستقبل الرقص الشرقي مش هيبقى إن الستات ترقص في الكباريهات وأماكن السهر، والمفروض يتقدم بشكل هادف، ومش معترضة على تقديمه في الأماكن دي، لأن بداية كانت فيهم، عشان ده الموجود، ولكن بالطريقة دي مش هيبقى معترف بيه كـ فن.
وأضافت إيمي: المفروض عشان الرقص الشرقي يكون فن، يتقدم في مؤسسة ثقافية في متحف أو مسرح أو في التلفزيون لكل أفراد العائلة، وأسعى في الموضوع ده، من خلال تأسيسي لشركتي طرب، كولكتف، اللي من خلالها هنتج عروض فنية استعراضية هادفة، وبالفعل أنتجت أول عرض كان عن العصر الذهبي للسينما، وقدمته في ختام مهرجان الجونة السينمائي، بالدورة الماضية.
إيمي سلطان: الرقص علم وتاريخ مرسوم على جدران معابدنا
أما عن منتقدي الرقص، تابعت إيمي سلطان: مش محتاجة إني أرد على المنتقدين؛ لأننا بنتكلم في حاجة عبارة عن علم وليها مصادر تاريخية، وموثقة ولا نستطيع الجدال بشأنها، كما أنها مرسومة على جدران معابدنا منذ آلاف السنين، فإحنا مش هنتناقش مع حد هايف، ومش دارس ومش فاهم حاجة، اللي مش عاجبه الفن ده ممكن ميروحش يتفرج عليه ولا يقطع تذكرة عشانه، ولو شافه في التليفزيون ممكن يغير المحطة.
