نادية شكري تنتقد منظر الذبح في عيد الأضحى: بيولد العنف عند الأطفال
علقت الفنانة نادية شكري، بطلة مسرحية العيال كبرت، على منظر الذبح في عيد الأضحى، مشيرة إلى أنه يولد العنف لدى الأطفال.
وقالت نادية شكري لـ القاهرة 24: مينفعش أخلي الأطفال يشوفوا الدبح في العيد ومنظر الدم؛ وأكيد دي سنة وأوامر ربنا ولكن الأطفال هيتعودوا على منظر الدم، ودا هيولد عندهم دافع للعنف وأنا مقدرش أشوف منظر الدم والدبح، وممكن نخلي الدبح في أماكن محددة، وفكرة إني أخلي ابني يشوف الدبح ملهاش علاقة بالتربية أو إني بخليه راجل.
أما عن سبب اختفائها الفترة الماضية، علقت نادية: معتزلتش الفن ولكن ليا طريقة في التمثيل مبقتش موجودة وبيطلبوا مني أعمل تجارب أداء وأروح مكاتب كاستنج، وكأني لسه ببدأ من جديد وأنا مقبلش بـ كدا لأن الزمان المخرج نفسه كان بيقابل الممثل ومنهم مخرجين كبار، وبالتالي أنا لا يمكن أتنازل عن كرامتي.
وواصلت نادية شكري: التمثيل دلوقتي بقى بنظام الشلل والعلاقات وبالتالي بنشوف نفس الممثلين في جميع الأعمال وهما اللي بيسافروا وبيروحوا المهرجانات، والجيل بتاعي بيعاني وسط كل دا، وبطلت أظهر في أي لقاءات تلفزيونية لأني كنت بعمل كدا لمجرد التواجد على الساحة ولقيت مفيش نتيجة وقولت أسيبها على ربنا.
ويذكر أن، حققت نادية شكري نجاحا كبيرا بـ شخصية سحر في مسرحية العيال كبرت بالتعاون مع عدد كبير من الفنانين، من بينهم يونس شلبي، وسعيد صالح.
