عفاف شعيب: شويكار كلمتني قبل وفاتها بـ أسبوع وقالتلي اوعي تنسيني.. ومطمنة عليها عشان كانت بتصلي الفجر
تحدثت الفنانة عفاف شعيب، عن الفنانة الراحلة شويكار، معربة عن اشتياقها الكبير لها، مشيرة إلى أنها كانت تجمعهم علاقة صداقة قوية.
وقالت عفاف شعيب، في تصريحات تلفزيونية: كلمتني قبل ما تموت بـ أسبوع، قالتلي عفاف اوعي تنسيني، قُلت لها هو حد ينساكي يا جميلة الجميلات؟ وكانت بتكرر عليا الكلمة، قلقت عليا وكلمتها بعدها بيومين مردتش، وعرفت بعد كده خبر وفاتها المزعج.
وأضافت: هي كانت تعبانة وكانت بتقاوح، رجليها كانت بتوجعها أوي وكان فيه حاجات صحية بالنسبة لها مش لطيفة يعني فكانت مبتشتكيش، واللي كان مطمني عليها إنها كانت بتسهر لغاية ما تصلي الفجر وتنام، وكُنت أقول لها استني صلي الشروق ونامي، وقبل وفاتها بفترة طويلة قالتلي أنا ملتزمة دلوقتي وبحس براحة نفسية غريبة، الحمد لله مطمنة عليها، ولما روحت معاها المدافن وقت دفنها كنت حاسة براحة نفسية.
وعن بداياتها في مجال التمثيل، أوضحت عفاف شعيب قائلة: حصلت لي مواقف غيرة كتير من بعض الفنانات وخصوصا في بدايتي الفنية، بعد ما كنت هشارك في مسلسل لبنى وقيس بدور ثانوي جه محمود المليجي وقال دي تعمل دور لبنى.. إنتوا معاكوا صاروخ وبالفعل جسدت شخصية لبنى في المسلسل وحققت نجاحًا كبيرًا.
كما أكدت الفنانة عفاف شعيب أنها لا تهتم بمن يطلق الشائعات، قائلة: أنا مبهتمش مين اللي بيطلع الشائعات، لأني لو اهتميت هتعب نفسيًا وصحيًا، ولما يكون حد أعرفه وعزيز عليا ويجي من ورايا ينخرب بزعل طبعًا، وباخد موقف وبقطع علاقتي معاه، ودلوقتي كمان المشكلة إن لو ستات مجتمعين مع بعض بيسجلوا لبعض، يعني كده بتعتدي على حرمة اللي قدامك.
