رامي جمال: الشاعر بهاء الدين قالي شوف شغلانة غير المزيكا في بداياتي
كشف الفنان رامي جمال، سبب رفضه من قِبل لجنة التحكيم في برنامج ستار ميكر، عندما تقدم لاختبارات الأداء في بداية مشواره الفني.
وقال رامي جمال، خلال لقائه في برنامج سهرانين، الذي يقدمه الفنان أمير كرارة، والمذاع عبر شاشة قناة ON: أنا بدأت أغني من وأنا في الحضانة، فأنا عارف حجم موهبتي، ودايمًا عندي الإيمان إن الحاجة دي هوصل بيها في يوم من الأيام، أنا كويس في اللي أنا فيه دلوقتي، ولكن ده مش حلمي، أنا طمعان في نجاح أكبر من اللي أنا فيه.
وتابع حديثه عن الشاعر بهاء الدين محمد، قائلًا: أستاذ بهاء الدين محمد مش أول حد يحبطني، ولكن هو أول خطوة إحباط متشافة قدام الناس، ولما قالي إحنا عايزين نشتغل سوا، هو مكنش فاكر إنه قال لحد في يوم من الأيام شوف شغلانة تانية غير المزيكا.
حديث الشاعر بهاء الدين محمد لـ رامي جمال
وأضاف: ولما في مرة كلمني وقالي عايزين نشتغل سوا أنت مُلحن شاطر، وأنت مطرب شاطر، قُلت له يا أستاذ بهاء أنا نفس الشخص اللي حضرتك قُلت له من 20 سنة شوف شغلانة تانية غير المزيكا، قالي أنت عارف إن بسببك أنا برامج المسابقات مش هقبلها.
كما تحدث رامي جمال، عن أغنية طمنوني عنيك للفنان محمد حماقي، مشيرًا إلى أنها من أصعب الأغاني التي قام بتلحينها، قائلًا: من أكتر الأغاني اللي تعبتني في تلحينها هي أغنية طمنوني عنيك لمحمد حماقي، ولحنت الجملة التانية من الأغنية ومكنتش عارف أطلع لحن الجملة الأولى، وقُلت لـ توما شوف حد تاني يطلع اللحن أنا مش عارف.
واستكمل: في يوم كنت باكل مع توما، وطلبنا منقوشة، وإحنا بناكل جالي اللحن المناسب للأغنية، وبعته لحماقي ووافق عليه.
