عفاف شعيب: السوشيال ميديا متسقصداني.. والناس مبتحبش الحقيقة
أعربت الفنانة عفاف شعيب، عن غضبها بسبب الانتقادات التي تلاحقها من قِبل رواد مواقع التواصل الاجتماعي، مؤكدة أنها لا تقول سوى الحقيقة.
وقالت عفاف شعيب، في فيديو نشره الإعلامي عمرو الليثي، لإعلان حلقته مع الفنانة عفاف شعيب، في برنامجه واحد من الناس: السوشيال ميديا مستقصداني ومستلماني.. عايزاكم يبقى صدركوا رحب لأني صادقة في كل كلمة بقولها، ومبعرفش ألوع الكلام ولا أكذب.. بقول الحقيقة والناس الواضح إنها مبتحبش الحقيقة، وكلام المنافقين أنا ماليش فيه.
عفاف شعيب
في سياق متصل، تعرضت الفنانة عفاف شعيب، مؤخرًا لـ موجة من الانتقادات، بعد تصريحاتها الأخيرة بشأن معانتها بعدم تمكنها شراء ملابسها من ألمانيا، كما كانت تفعل من قبل.
وذكرت الفنانة، خلال حوارها في أحد البرامج التليفزيونية: مش كل الموديلات بتناسبنا كمحجبات ومظلومين، وأنا لأني كنت بسافر كتير فلبسي كله من بره.. دلوقتي مفيش استيراد وبقيت في حوسة، وفي محل كنت بتعامل معاه من زمان، وكنت باخد منه لبس بالهبل وكل البدل المستوردة من ألمانيا.
وعلقت عفاف شعيب على هذه الانتقادات، خلال تصريحات تليفزيونية قائلة: أكيد بزعل من الهجوم.. ليه كده؟.. راعوا شعور الناس وبلاش تشيلوا ذنوب.. روحوا سبّحوا أو اقرأوا قرآن.. اللي بيخاف ربنا ميأذيش مشاعر الناس.
وأضافت: قُلت بجيب لبسي كله من بره لما كنت بسافر بره.. ليه ما تكلمتوش على اللي بيجيبوا فستان بمليون جنيه.. مقاسات اللبس الألماني مظبوطة عليا، وشكله شيك ومحترم.
واختتمت الفنانة حديثها: الألمان مقاساتهم مضبوطة.. الملابس من أول لبسة بتكون مضبوطة عليا، وساعات ألف محلات مصر مبلاقيش الحاجة المناسبة، واللي بيهاجموني ناس فاضية ومعندهاش ضمير وحسابهم في الآخرة عسير.
