الإغراء ممكن يتقدم بالعين وأنا ست فقيرة.. أبرز تصريحات شيرين مع القاهرة 24
أكدت الفنانة شيرين أنها لا تمانع من أداء أدوار الإغراء، مشيرة إلى أن الإغراء من الممكن أن يقدم بالعين.
وقالت شيرين لـ القاهرة 24: ممكن الفنانة تقدم الإغراء بعنيها أوشكلها وجسمها، وهند رستم ماكنتش بتقدم عري ومع ذلك كانت مغرية جدًا.
وأعربت شيرين عن استنكارها من حديث البعض عن إقامة علاقة قبل الزواج، قائلة: ده غير مناسب لا لديننا ولا الدين المسيحي ولا أي دين في الكون، وصعب حتى إني أردده بلساني.
أنا فقيرة
كما ردت الفنانة شيرين على الانتقادات التي تعرضت لها بعد تصريحها بممانعتها التبرع للغارمات، موضحة: الناس عندها موروث بيقول إني لازم أجهز بنتي بـ 24 بطانية و24 ملاية، وحاجات فوق الخيال وأنا بقول إن ده كتير على أي أب أو أي أم، في الوقت الحالي أو قبل كده، وأنا ضد أي ست أو راجل تتحبس والفقر عمره ما كان عيب أنا ست فقيرة أساسا بس أنا بفكر بعقلي ولازم الواحد يكون عنده قناعة ويعلم ولاده يكون عندهم قناعة.
وحرصت شيرين على توجيه رسالة إلى المطربة شيرين عبدالوهاب، بعد أزمتها الأخيرة ودخولها أحد المستشفيات للعلاج من إدمان المخدرات، وقالت شيرين: بقول لشيرين كلنا بني آدمين وبشر، وكلنا بنغلط، وأنتِ صوت جميل وربنا إداكي موهبة وهتقومي وترجعي لجمهورك وبناتك وتفرحي بيهم.
وأشارت إلى أن شيرين كانت تحتاج لعلاج نفسي من فترة كبيرة، موضحة: أنا شايفة إنها كانت المفروض تتعالج نفسيًا منذ طلاقها من زوجها الأول، لأنها هي طلعت في كذا برنامج وعيطت وقالت أرجوك ما تسيبنيش، هي من زمان المفروض كانت تتعالج نفسيًا علشان نفسيتها تقوى، في ناس بتشوفيها زي العمارة الهايلة من جوه نفسيتها هشة.
وأضافت: شيرين موهبة عظيمة وهايلة وعندها صوت هايل وعبقرية لكن مش بتعرف تتكلم، ومطلوب منها تغني فقط، وده مش عيب لما الفنان يكون عندي عيب معين لازم يخبيه، لو رجلي وحشة ما ألبسش قصير.
كما صرحت شيرين بأنها تعتقد أن المطربة شيرين عبدالوهاب ليست مدمنة مخدرات، ولكنها تأخذ أدوية نفسية، حيث إن الأدوية النفسية بها نسبة مخدر حسب ما قالت، قائلة: كانت بتتعالج نفسيًا مؤخرًا فممكن تكون بتاخد بعض الأدوية اللي مصرح بيها بيكون فيها نسبة من المخدر لو عملنا تحاليل يطلع فيها نسبة من المخدر لكنها مش مدمنة مخدرات، لكن في ناس كتير بقت هي المحامي والقاضي وعشماوي ما ينفعش نحكم على حد بالإعدام، والمرض النفسي مش عيب ولكن شيرين محتاجة حد يقويها ويدعمها.
يا رب الزعيم يعيش 180 سنة
وأعربت شيرين عن استيائها الشديد من الشائعات التي تخرج من حين لآخر على الزعيم عادل إمام، والتي تزعم وفاته، وقالت: منهم لله ألف مليون مرة اللي موتوا عادل إمام ألف مرة، حسبي الله ونعم الوكيل، وأنا بكلمه على طول وبطمن عليه، ويا رب الزعيم يعيش 160 أو 170 أو 180 سنة ويخذل الناس كلها.
واستكملت شيرين: الأعمار بيد الله، لكن كفاية الناس تكون هيفا وفاضية، الناس زمان كانت بتقرأ الجرنال وتعرف وتتثقف ولكن للأسف دلوقتي الناس معلوماتها من السوشيال ميديا، زمان قبل السوشيال ميديا كنا مثقفين.
ما تجوزتش غير مرة واحدة
وأكدت شيرين، أنها لم تتزوج سوى مرة واحدة وأنجبت ابنة واحدة، مشيرة إلى أنها لم تكن متفرغة للزواج لأنها كانت منشغلة بأسرتها وعملها بالفن وقضايا أخرى موضحة: عمري ما أتجوزت غير مرة، يوريني نفسه اللي اتجوزني لو هو راجل ابن راجل، لما أتجوز لازم أكون بتباهى بيه وأن سمه هيرتبط باسمي وأنا مش متجوزة عرفي ولا رسمي هي مرة وعندي بنت واحدة، لأن كان عندي أسرتي وقضايا كتير بتشغلني مش فاضية أتجوز النهاردة وأطلق بكرة هشوفه فين ده هيكون مسكين لأنه مش هيلاقيني.
واستكملت: الفن بيقوله زي الفريك ما يحبش شريك، ولو كنت أتجوزت هكون محتاجة لحد عنده سعة صدر وملاك نازل من السما في صورة راجل علشان يتفهم ظروف شغلي ومش الفن بس مهن كتير تانية زي الدكاترة، والست اللي متجوزة دكتورمظلومة خاصة لو كبير ومشهور وله اسم، مش هيقى موجود لأنه هيكون بيعمل عمليات.
