خالد الصاوي: بنصح الشباب ميعملوش أي علاقة غلط.. والفن أنقذني من الإدمان والإجرام
نصح الفنان خالد الصاوي الشباب بعدم إقامة أي علاقة خاطئة، مشيار إلى أن الفن أنقذه من الدخول في طرق كثيرة خاطئة مثل الإدمان والإجرام.
خالد الصاوي يتحدث عن انقاذ الفن له
وتحدث الفنان خالد الصاوي، في تصريحات لـ برنامج حبر سري المذاع عبر قناة القاهرة والناس، عن بداية حياته، حيث أكد أن الفن أنقذه من الدخول في طرق كثيرة خاطئة مثل الأدمان والإجرام، حيث قال: الفن انقذني من الأدمان والإجرام والجنان وكل حاجة وحشه، لأني مريت بكل حاجة وحشة وخدت خطوات في كل حاجة بس الفن انقذني اني مدخلش جامد في الحاجات دي.
وعن نصحيته للشباب علق خالد الصاوي: بنصح الشباب أنهم مايشربوش أي حاجة غلط، ولا يعملوا أي علاقة غلط، ولا يأكلوا أي حاجة غلط، أنا عن نفسي راضي بس عن 50% من حياتي، والـ 50 الباقيين نفسي استبدلهم بأي حاجة تانية، وبنصح الشباب دايما أنهم لو هياخدوا مني نصيحة ياخدوا 50% الحلوة بس.
وفي سياق متصل، قال خالد الصاوي: أنا على طول ضميري تعبني ومابعرفش أنام، لأني عصبي جدًا وبتعصب على كل الناس وبضيع شغل من أيدي بسبب العصبية دي وأرجع أندم على ده، موضحًا: أوقات بظلم ناس كتير من غير ما قصد، وبعتذر على طول بعدها، ولو في حاجة أقدر أقدمها غير الاعتذار هقدمها.
وتابع: في حاجات كتيرة ممنوعة في حياتي لسه مرغوبة، وزمان كان فيه ممنوع ومرغوب كنت بعمله، بس دلوقتي بقيت بعرف أسيطر على نفسي
وعن فرق السن بين الزوجين قال الصاوي: مانصحش يكون في فرق في السن بين الزوجين، وأنا ومراتي وضع مختلف لأن دماغها أكبر من سنها بكتير وأنا دماغي أصغر من سني بكتير فعرفنا نتوافق مع بعض.
وختم حديثه قائلًا: أنا مستحيل أتجوز على مراتي، ولو الراجل بطبعه خاين يبقى للأسف مش راجل، وعلق مازحًأ: اللي يتجوز مره مايعملهاش تاني.
