وفاء صادق عن مشاركتها في مسرحية عيلة اتعملها بلوك: كممثلة أحط في الـ CV إني وقفت على مسرح محمد صبحي
أعربت الفنانة وفاء صادق، عن سعادتها بمشاركتها في مسرحية عيلة اتعملها بلوك مع الفنان محمد صبحي، والنجاح الكبير الذي حققه العرض المسرحي، منذي بداية عرضه على مسرح سنبل.
وأكدت وفاء صادق لـ القاهرة 24، أنها كممثلة فخورة بالعمل مع الفنان محمد صبحي، مشيرة أنها ستضع هذا العمل في CV الخاص بها، موضحة: مفيش شك أن مفيش ممثل ميحبش أنه يشتغل مع الفنان محمد صبحي وأنه يبقى موجود في مسرح صبحي لأن دي علامة وأنا كممثلة أحط في cv بتاعي أني وقفت على مسرح محمد صبحي.
كما تحدثت وفاء صادق، عن مسرحية عيلة اتعملها بلوك: المسرحية بالنسبالي مبهورة بيها، وأحنا بنشوف الورق مكناش متخيلين فكر الفنان محمد صحبي رايح لـ فين، أننا نقدم العصور دي وأن أحنا نخلي المتلقى من اول سن 12 سنة وأطفال أنهم يبقوا واعيين ويقارنوا ويشوفوا نفسهم ويشوفوا القديم دا في حد ذاته مبهر، يخليني كممثلة عندي نوع من الإشباع.
واشارات وفاء صادق إلى الشروط التي وضعها الفنان محمد صبحي، لدخول مسرح مدينة سنبل، إذ أكدت أن أي ممثل يحب مهنة التمثيل لا يعتبرها شروط، قائلة: أي فنان بيحترم وبيحب مهنته مش هيشوفها شروط وهي مش شروط هي تقاليد المسرح وأنا اترببت في عيله فنية وعارفه تقاليد مهنتي كويس، بالعكس الشروط دي بتخلينا مركزين وأحنا بنشتغل والذهن صافي جدًا وبنطلع شغلنا على أكمل وجه، ومش شيفاها شروط على قد مانا شايفة أننا بنعمل الصح واللي شايفها بقا شروط دي تخصه هو.
وفاء صادق تتحدث عن مسلسل وبينا معاد
وتطرقت الفنانة وفاء صادق، في حديثها إلى دورها في مسلسل وبينا معاد، مُعلقة: استقبلت رد فعل الجمهور بـ سعادة وأحنا بنشتغل مش عارفين إيه اللي جاي سواء الناس هتقول حلو ولا وحش، إحنا بنحاول نعمل اللي علينا وأنا كممثله بنقي الورق اللي بيجلي وبفكر وبتناقش وبشوف هل الورق ده هيضيف أو هيوصلني لحاجة ولا لأ، والنجاح على ربنا وعلى الجمهور الواعي اللي بيقى شايف أننا بنوصله حاجة بتلمسه وحاجة هو بيشوفها وعايشها.
مسلسل لن أعيش في جلباب أبي
وعن مسلسل لن أعيش في جلباب أبي، فقالت وفاء صادق: المسلسل بجد وحقيقي وكان شبهنا وشبه البيوت زمان، باختلاف طبقتنا وأفكارنا، مفيش حد معندوش في العيلة شخص عصامي أبتدى من الصفر ومفيش حد ماشفش المفارقات دي في المجتمع، وأعتقد أن هو ده السبب أن يخلي مسلسل عايش 25 سنة ومش جلباب أبي بس على فكرةـ في أمثلة كتير زي يوميات ونيس، وأنا اتربيت على يوميات ونيس.
وفاء صادق تتحدث عن رامز جلال
ومن جهة أخرى، كشفت الفنانة وفاء صادق، خلال تصريحاتها أن الفنان رامز جلال، اعتاد على عمل المقالب في زملائه منذ وقت دراستهم في معهد الفنون المسرحية، قائلة: رامز جلال بيعمل فينا مقالب من أيام المعهد، ورامز مش جديد علينا وربنا يوفقه وبيعمل ضحك لطيف وخفيف والزملاء بيقوا مبسوطين بيه.
وأضافت وفاء صادق، أن النجوم في برنامج رامز جلال كل عام، يكنون على دراية بأنه برنامج مقالب قبل تصوير الحلقة، موضحة: لا اعتقد أن حد هيروح لـ رامز هو مش حابب رامز ومش حابب يقعد مع رامز، وأعتقد أن رامز بيحترم الـ مش عايز يعمل ده ومبيجبروش يعني والـ رايح رايح بمزاجه وعايز يتبسط.
