محمود الليثي: طالما مش بقدم أغاني خادشة يبقى أنا في حمى ربنا
تحدث المطرب محمود الليثي عن والده وكيف رباه على الإيمان بالله والصلاة، كما كشف سبب نجاحه وحب الناس له، إلى جانب توجيه نصيحة للشباب.
وقال محمود الليثي: أبويا كان بيأكلنا حلال وبيخاف علينا، وربنا يعطي له الصحة ماكنش هامه حاجة غير سعادتنا وما كانش بيفرق بيني وبين أخواتي، وهو أبسط من البساطة، والفقير فقير تفكير.
تصريحات محمود الليثي لـ القاهرة 24
ووجّه الليثي نصيحه للشباب قائلًا: إذا اتربيت على الإيمان بالله عز وجل فأنت كده نجحت نجاح عظيم، لأنك ضيف على الدنيا والمهم تخرج منها نضيف علشان كده بنقول ربنا يلهمنا حسن الخاتمة، وأهم حاجة تتمسك بربنا وبإيمانك، فأنت مخلوق علشان تصلي صلي، ومخلوق ما تعملش المحرمات ما تعملهاش، خليك في حمى ربنا علشان ربنا يحميك ولو هدور على حاجة تضرك أنت مش أقوى من ربنا.
وأضاف المطرب الشعبي: نفسي الرسالة دي توصل لسن 14 لأن إذا ضاع الإيمان ضاع الأمان.
وأردف محمود الليثي: عاوزة أفهمكم حاجة أنت ممكن تعمل غنوة تكسر الدنيا وشرايط يكسروا العالم لكن من غير ربنا وحب الناس مش هتطلع خطوة، والنجومية مسؤولية لازم تعمل حساب حب الناس، ولازم تبقى متابع الناس ومحاوطهم وتكون جوه الناس، وتجبر الخواطر.
وواصل الليثي: أنا لما عملت التلات الشرايط في بدايتي وبعدها روحت لأحمد السبكي في فيلم كباريه الفيلم عمل نجاح كبير جدًا بسبب كرم ربنا.
ووجه الليثي رسالة عن انتقاد المطربين قائلًا: أنا بدخل أبسطك في فرحك، وأنت لما بتعمل فرح جايبني ليه؟ علشان أبسطك، وبعمل لك أغاني علشان تبقى فرحان، لأن الفرحة مكانها القلب وربنا ملك القلوب، وطالما مش بعمل حاجة تضر الناس ولا تخدش الحياء والأدب يبقى أنا في حمى ربنا.
